لاہور
پاکستان کے محکمہ موسمیات (پی ایم ڈی) نے پنجاب سمیت ملک کے مختلف علاقوں میں آئندہ پانچ روز کے دوران گرج چمک کے ساتھ تیز بارشوں اور وقفے وقفے سے بارش کا امکان ظاہر کیا ہے۔ محکمہ موسمیات نے ممکنہ صورتحال کے پیش نظر دریاؤں، نہروں اور نشیبی علاقوں میں احتیاطی تدابیر اختیار کرنے کی ہدایت کی ہے۔
لاہور سمیت پنجاب کے کئی شہروں میں بارش کا سلسلہ جاری ہے، جبکہ اسلام آباد اور راولپنڈی میں وقفے وقفے سے ہونے والی بارش کے باعث موسم خوشگوار ہوگیا اور درجہ حرارت میں کمی ریکارڈ کی گئی۔
محکمہ موسمیات کے مطابق بارشوں کا یہ سلسلہ آئندہ ہفتے تک جاری رہنے کا امکان ہے، جس کے دوران تیز ہواؤں، آندھی اور گرج چمک کے ساتھ موسلادھار بارش بھی ہو سکتی ہے۔
پی ایم ڈی کے مطابق لاہور میں تیز ہواؤں کے باعث موسم نسبتاً ٹھنڈا رہنے کا امکان ہے۔ شہر کا موجودہ درجہ حرارت 27 ڈگری سینٹی گریڈ ریکارڈ کیا گیا، جبکہ زیادہ سے زیادہ درجہ حرارت 32 ڈگری سینٹی گریڈ تک رہنے کی توقع ہے۔
ضلعی انتظامیہ کو ہائی الرٹ رہنے کی ہدایت
ممکنہ شدید بارشوں کے پیش نظر پنجاب ڈیزاسٹر مینجمنٹ اتھارٹی (پی ڈی ایم اے) نے صوبے بھر کے ڈپٹی کمشنرز کو ہدایت کی ہے کہ ضلعی انتظامیہ الرٹ رہے اور کسی بھی ہنگامی صورتحال سے نمٹنے کے لیے تمام ضروری اقدامات مکمل رکھے جائیں۔
پی ڈی ایم اے نے شہریوں کو شدید بارش کے دوران غیر ضروری سفر سے گریز کرنے کا مشورہ دیا ہے۔ شہریوں کو برساتی نالوں، ندی نالوں، نہروں، بجلی کے کھمبوں اور خستہ حال عمارتوں سے دور رہنے کی ہدایت کی گئی ہے، کیونکہ خراب موسم کے دوران ان مقامات پر خطرات بڑھ سکتے ہیں۔
حکام نے عوام پر زور دیا ہے کہ وہ موسم سے متعلق سرکاری ہدایات پر عمل کریں اور احتیاطی تدابیر اختیار کریں۔ مسلسل بارشوں کے باعث بعض علاقوں میں مقامی سیلابی صورتحال پیدا ہونے اور معمولات زندگی متاثر ہونے کا خدشہ ظاہر کیا گیا ہے۔
