کراچی کے علاقے نیو کراچی صدیق آباد قبرستان کے قریب پولیس نے بڑی کارروائی کرتے ہوئے میاں بیوی پر مشتمل ایک منظم اور خطرناک ڈکیت گینگ کو گرفتار کر لیا۔ پولیس کے مطابق کارروائی کے دوران ملزمان اور اہلکاروں کے درمیان فائرنگ کا تبادلہ ہوا، جس میں دو ملزمان زخمی ہوئے جبکہ ایک خاتون سمیت چار افراد کو حراست میں لے لیا گیا۔پولیس حکام کا کہنا ہے کہ ابتدائی تفتیش میں گرفتار ملزمان نے 64 لاکھ روپے کی بڑی ڈکیتی میں ملوث ہونے کا اعتراف کیا ہے۔ ملزمان نے 20 اپریل کو نیو سبزی منڈی گیٹ کے قریب ایک پیٹرول پمپ کے مالک سے رقم لوٹی تھی اور مزاحمت کرنے پر اسے فائرنگ کر کے زخمی بھی کر دیا تھا۔ واقعے کی سی سی ٹی وی فوٹیج پہلے ہی پولیس کے قبضے میں موجود تھی، جس کی مدد سے ملزمان تک رسائی حاصل کی گئی۔تفتیش کے دوران یہ بھی انکشاف ہوا کہ یہی گروہ سرجانی ٹاؤن میں ایک میڈیکل اسٹور پر ہونے والی ڈکیتی میں بھی ملوث تھا۔ پولیس کے مطابق گرفتار گینگ شہر بھر میں اسٹریٹ کرائم اور ڈکیتی کی متعدد وارداتوں میں سرگرم تھا، جبکہ مزید اہم انکشافات اور ساتھیوں کی گرفتاری کے لیے تحقیقات جاری ہیں۔
