ایرانی صدر مسعود پزشکیان نے کہا ہے کہ اگر دنیا میں پائیدار امن اور استحکام قائم کرنا ہے تو اس کی بنیاد مشرق وسطیٰ کے خطے سے ہی پڑے گی۔
تہران میں ایک تقریب سے خطاب کرتے ہوئے مسعود پزشکیان کا کہنا تھا کہ ایران جنگ کا خواہاں نہیں، تاہم کسی بھی جارحیت کا بھرپور جواب دینے کے لیے تیار ہے۔
ایرانی صدر نے کہا کہ مضبوط عزم رکھنے والی قوم کو ہتھیار ڈالنے پر مجبور نہیں کیا جا سکتا، ایران کسی بھی دھمکی کے سامنے سر نہیں جھکائے گا۔
ان کا کہنا تھا کہ ایران نے جنگ شروع نہیں کی اور نہ ہی وہ جنگ چاہتا ہے، تاہم اگر کسی جانب سے جارحیت کی گئی تو ایران اپنی پوری طاقت کے ساتھ اس کا مقابلہ کرے گا۔
مسعود پزشکیان نے خطے میں امن اور استحکام کے لیے علاقائی ممالک کے درمیان تعاون اور باہمی اعتماد کو انتہائی اہم قرار دیتے ہوئے کہا کہ خطے کے ممالک کو اپنی سلامتی اور مستقبل کے حوالے سے خود فیصلہ سازی کو ترجیح دینی چاہیے
