عدالتی حکم پر گورنمنٹ دہلی اسکول سیل، طلبہ اور اساتذہ کا احتجاج، بچے تالا توڑ کر اسکول میں داخل
کراچی: عدالتی حکم پر گورنمنٹ دہلی اسکول کو سیل کیے جانے کے خلاف طلبہ، اساتذہ اور والدین نے شدید احتجاج کیا۔ مظاہرین نے اسکول کھولنے کا مطالبہ کرتے ہوئے اسکول کے باہر دھرنا دیا اور سڑک پر ہی کلاسیں لگانے کا اعلان کیا۔
طلبہ پلے کارڈز اٹھائے سڑک پر موجود رہے اور احتجاج کے دوران اسمبلی بھی کی گئی۔ اسکول کے پرنسپل علی خان نے کہا کہ اسکول میں 2800 سے زائد طلبہ زیرِ تعلیم ہیں، جن میں تقریباً 2100 طالبات اور 700 طلبہ شامل ہیں۔
پرنسپل کے مطابق اتنی بڑی تعداد میں طلبہ کو کسی دوسرے قریبی اسکول میں منتقل کرنا ممکن نہیں، کیونکہ اطراف میں ایسا کوئی بڑا اسکول موجود نہیں جہاں تمام بچوں کو داخلہ دیا جا سکے۔
بعد ازاں احتجاج کرنے والے بچے اسکول کے مرکزی گیٹ پر پہنچے اور تالا توڑ کر اسکول میں داخل ہوگئے۔
دوسری جانب محکمہ تعلیم نے طلبہ کو قریبی سرکاری اسکولوں میں منتقل کرنے کی منصوبہ بندی شروع کر دی ہے۔ تاہم طلبہ، والدین اور اساتذہ کا مطالبہ ہے کہ تاریخی گورنمنٹ دہلی اسکول کو فوری طور پر کھولا جائے تاکہ بچوں کی تعلیم متاثر نہ ہو۔
واضح رہے کہ عدالتی حکم کے تحت اسکول کی عمارت کا قبضہ اولڈ بوائز ایسوسی ایشن کے حوالے کرنے کا فیصلہ کیا گیا ہے۔
