نیوز ڈیسک
یمن کی سرکاری افواج نے ایران کے حمایت یافتہ حوثی باغیوں کے خلاف گزشتہ چند گھنٹوں کے دوران 723 فضائی، ڈرون، راکٹ اور توپ خانے کے حملے کرنے کا دعویٰ کیا ہے، جبکہ سعودی عرب کی قیادت میں قائم فوجی اتحاد نے بھی حوثیوں کے دو ڈرون مار گرانے کی اطلاع دی ہے۔
قطری نشریاتی ادارے الجزیرہ کے مطابق یمنی سرکاری افواج کے ترجمان ماجد عبداللہ النزیلی نے سماجی رابطے کی ویب سائٹ ایکس پر جاری بیان میں بتایا کہ حوثی باغیوں کے خلاف کی جانے والی کارروائیوں میں 37 فضائی حملے، 56 ڈرون حملے، 89 راکٹ حملے اور توپ خانے سے 541 حملے شامل تھے۔
ترجمان کے مطابق ان کارروائیوں میں حوثی باغیوں کے ٹھکانوں، اجتماعات، گاڑیوں اور فوجی سازوسامان کو نشانہ بنایا گیا۔ انہوں نے کہا کہ عوامی مزاحمت کی حمایت سے سرکاری افواج صوبہ تعز میں حوثیوں کے خلاف آپریشن جاری رکھے ہوئے ہیں، جبکہ مارب اور الجوف سمیت جنوبی اور جنوب مغربی محاذوں پر بھی جھڑپیں جاری ہیں۔
ماجد عبداللہ النزیلی نے ابتدائی میدانی اندازوں کا حوالہ دیتے ہوئے دعویٰ کیا کہ تازہ کارروائیوں میں حوثی جنگجوؤں اور رہنماؤں سمیت 321 افراد ہلاک یا زخمی ہوئے، جبکہ 117 گاڑیوں اور فوجی سازوسامان کو نقصان پہنچا۔
دوسری جانب بی بی سی کے مطابق سعودی عرب کی قیادت میں قائم فوجی اتحاد نے دعویٰ کیا ہے کہ اس نے حوثی باغیوں کی جانب سے سعودی عرب کی طرف بھیجے گئے دو ڈرون تباہ کر دیے ہیں۔
اتحاد کے مطابق یہ ڈرون سعودی دارالحکومت ریاض اور ملک کے جنوبی علاقوں کی جانب بھیجے گئے تھے، تاہم دفاعی نظام نے انہیں اپنے اہداف تک پہنچنے سے پہلے ہی روک کر تباہ کر دیا۔
تاحال ان کارروائیوں اور نقصانات سے متعلق حوثی باغیوں کی جانب سے کوئی مؤقف اس رپورٹ میں شامل نہیں ہے۔
