نیوز ڈیسک
واشنگٹن: امریکی اور اسرائیلی حملوں میں ایران کی میزائل اور اسلحہ ساز تنصیبات کو نشانہ بنائے جانے کے باوجود تہران کے پاس اب بھی 1500 سے 2500 میزائل موجود ہونے کا انکشاف ہوا ہے۔ امریکی انٹیلی جنس کے تازہ جائزے نے صدر ڈونلڈ ٹرمپ کے ان دعوؤں پر سوالات اٹھا دیے ہیں کہ ایران کی فوجی صلاحیت بڑی حد تک تباہ ہو چکی ہے۔
امریکی اخبار ’وال اسٹریٹ جرنل‘ کی رپورٹ کے مطابق امریکی حکام کا کہنا ہے کہ ایران کا میزائل ذخیرہ اب بھی امریکی اور اس کے اتحادیوں کے لیے خطرہ بن سکتا ہے، خصوصاً ایسی صورت میں جب خطے میں دوبارہ جنگ شروع ہوتی ہے۔
رپورٹ میں بتایا گیا ہے کہ امریکی انٹیلی جنس کو اس تخمینے پر مکمل اعتماد نہیں، کیونکہ یہ واضح کرنا مشکل ہے کہ ایران کے کتنے میزائل فوری طور پر داغے جانے کے قابل ہیں اور کتنے مختلف ذخیرہ گاہوں میں موجود ہیں۔
رپورٹ کے مطابق ایران نے میزائلوں کی تیاری اور اپنے ذخیرے کی بحالی کا عمل شروع کر رکھا ہے، تاہم اس کی رفتار جنگ سے پہلے کے مقابلے میں سست ہے۔ تہران کے پاس بڑی تعداد میں ڈرونز اور کم فاصلے تک مار کرنے والے میزائل بھی موجود ہیں، جو مشرق وسطیٰ میں مختلف اہداف کو نشانہ بنانے کی صلاحیت رکھتے ہیں۔
وال اسٹریٹ جرنل کے مطابق اسرائیلی فوجی حکام کا اندازہ ہے کہ ایران کے پاس 1500 سے زائد بیلسٹک میزائل موجود ہیں، تاہم مختلف علاقائی جائزوں میں ان کی تعداد کے حوالے سے اختلاف پایا جاتا ہے۔
امریکی محکمہ دفاع کی سابق نائب معاون وزیر برائے مشرق وسطیٰ سیمون لیڈین کے مطابق اگر میزائلوں کی کم ترین تعداد کا تخمینہ بھی درست ہے تو اس سے ظاہر ہوتا ہے کہ ایران جنگ سے پہلے اپنے میزائل ذخیرے کا نصف سے زیادہ حصہ بحال کر چکا ہے۔
رپورٹ میں مزید کہا گیا ہے کہ ایران کے میزائل اور ڈرون حملوں نے مشرق وسطیٰ میں امریکی فوجی تنصیبات، ریڈار سسٹمز اور ابتدائی وارننگ کے نظام کی کمزوریوں کو بھی نمایاں کیا ہے۔
دوسری جانب امریکی حکام نے فی الحال ایران کے خلاف نئی بڑی فوجی کارروائی کے بجائے اقتصادی پابندیوں اور بحری ناکہ بندی کے ذریعے دباؤ برقرار رکھنے کی حکمت عملی اختیار کر رکھی ہے۔ خلیجی اتحادی ممالک بھی ایران کی ممکنہ جوابی کارروائیوں کے خدشے کے پیش نظر دوبارہ جنگ شروع کرنے کے مخالف ہیں، جبکہ اسرائیل مزید فوجی کارروائیوں پر زور دے رہا ہے۔
