نیوز ڈیسک
قندھار: افغان طالبان نے صوبہ قندھار کے تمام مقامی ریڈیو اسٹیشنوں کو کرکٹ سے متعلق خبریں، خصوصی پروگرام اور میچوں کی براہِ راست نشریات نشر کرنے سے روک دیا ہے۔
افغان اخبار ہشتِ صبح ڈیلی اور فرانسیسی خبر رساں ادارے اے ایف پی کے مطابق، مقامی ذرائع نے بتایا ہے کہ طالبان کے محکمہ اطلاعات و ثقافت نے قندھار کے ریڈیو اسٹیشنوں کو کرکٹ سے متعلق کسی بھی قسم کا مواد نشر نہ کرنے کی ہدایت جاری کی ہے۔
اس حکم کے تحت کرکٹ کی خبروں، کھیلوں کے خصوصی پروگراموں اور میچوں کی براہِ راست کوریج پر پابندی عائد کی گئی ہے۔ تاہم طالبان حکام نے تاحال اس فیصلے کی کوئی باضابطہ وجہ یا وضاحت پیش نہیں کی۔
قندھار کے ایک مقامی ریڈیو اسٹیشن کے سربراہ نے اے ایف پی کو بتایا کہ انہیں محکمہ اطلاعات و ثقافت کی جانب سے فون کال موصول ہوئی، جس میں کرکٹ کی نشریات روکنے کی ہدایت کی گئی تھی۔
ایک دوسرے ریڈیو اسٹیشن کے منتظم نے بھی اس پابندی کی تصدیق کرتے ہوئے بتایا کہ حکام نے فون پر واضح کیا کہ فی الحال کرکٹ سے متعلق ہر قسم کا مواد نشر کرنے کی اجازت نہیں ہوگی۔
افغانستان میں کرکٹ تیزی سے مقبول ہونے والے کھیلوں میں شامل ہے اور طالبان حکومت بھی ماضی میں اس کھیل کی حمایت کا اظہار کرتی رہی ہے۔
رواں سال اگست میں طالبان کی اقتدار میں واپسی کی سالگرہ کے موقع پر ہونے والی تقریبات میں کرکٹ میچز کا انعقاد بھی کیا گیا تھا۔
قندھار میں کرکٹ نشریات پر پابندی ایسے وقت میں عائد کی گئی ہے جب افغان کرکٹ ٹیم متحدہ عرب امارات کے شہر شارجہ میں زمبابوے کے خلاف دوسرا ٹیسٹ میچ کھیل رہی ہے۔
افغان میڈیا کے مطابق، حالیہ دنوں میں سامعین کی بڑھتی ہوئی دلچسپی کے باعث قندھار کے ریڈیو اسٹیشنوں پر کرکٹ پروگراموں اور میچوں کی براہِ راست نشریات میں بھی اضافہ ہوا تھا۔
قابلِ ذکر ہے کہ طالبان کے سپریم لیڈر کی رہائش گاہ بھی قندھار میں واقع ہے۔
دوسری جانب طالبان حکومت نے ماضی میں بعض کھیلوں پر بھی پابندیاں عائد کی ہیں، جن میں مکسڈ مارشل آرٹس (ایم ایم اے) بھی شامل ہے، جسے غیر قانونی قرار دیا جا چکا ہے۔ اسی طرح خواتین اور لڑکیوں کی کھیلوں کی سرگرمیوں میں شرکت اور جم جانے پر بھی پابندیاں عائد ہیں۔
خواتین کے کھیلوں پر پابندیوں کے باعث بعض ممالک کے کرکٹ بورڈز نے بھی افغان کرکٹ ٹیم کے ساتھ دوطرفہ اور بین الاقوامی مقابلوں کے حوالے سے تحفظات کا اظہار کیا ہے اور بعض مواقع پر احتجاجاً میچز کھیلنے سے انکار کیا ہے۔
