نیوز ڈیسک
اسلام آباد: دنیا کی 500 بااثر مسلم شخصیات کی سالانہ فہرست ’دی مسلم 500‘ کے 2027 ایڈیشن میں وزیراعظم شہباز شریف اور چیف آف ڈیفنس فورسز فیلڈ مارشل سید عاصم منیر کو مشترکہ طور پر پہلی پوزیشن دی گئی ہے۔ اس فہرست میں سعودی عرب اور ترکیہ کی اعلیٰ قیادت بھی ان کے ساتھ سرفہرست ہے۔
اسلام آن ویب کی رپورٹ کے مطابق سعودی فرمانروا شاہ سلمان بن عبدالعزیز، ولی عہد محمد بن سلمان اور ترک صدر رجب طیب اردوان بھی مشترکہ طور پر پہلے نمبر پر شامل ہیں۔
اردن کے رائل اسلامک اسٹریٹجک اسٹڈیز سینٹر (RISSC) کی جانب سے جاری کردہ یہ 18واں سالانہ ایڈیشن ہے، جس میں پہلی مرتبہ پانچ عالمی رہنماؤں کو مشترکہ طور پر سرفہرست رکھا گیا ہے۔
رپورٹ میں پاکستان، سعودی عرب اور ترکیہ کی قیادت کے درمیان دفاعی اور تزویراتی تعاون کو اس مشترکہ درجہ بندی کا اہم پس منظر قرار دیا گیا ہے۔ اس ضمن میں 7 اگست 2026 کو طے پانے والے مکہ مشترکہ دفاعی معاہدے کو خصوصی اہمیت دی گئی ہے۔
فہرست کے خصوصی مضمون ’جوائنٹ نمبر ون‘ میں تینوں ممالک کی عسکری صلاحیتوں، مالی وسائل اور دفاعی ٹیکنالوجی کو باہمی تعاون کے اہم عوامل کے طور پر اجاگر کیا گیا ہے۔
پاکستانی قیادت کے حوالے سے رپورٹ میں وزیراعظم شہباز شریف کے سیاسی کردار اور معاہدے کے لیے حکومتی و انتظامی اقدامات کا ذکر کیا گیا ہے، جبکہ فیلڈ مارشل عاصم منیر کے کردار کو پاکستان کی عسکری صلاحیت اور دفاعی تعاون کے تناظر میں نمایاں کیا گیا ہے۔
واضح رہے کہ ’دی مسلم 500‘ میں مسلم دنیا کی ایسی نمایاں شخصیات کو شامل کیا جاتا ہے جو سیاست، مذہب، سماجی خدمات، تعلیم، معیشت اور دیگر شعبوں میں اثر و رسوخ رکھتی ہیں۔
