نیوز ڈیسک
واشنگٹن: امریکا میں فضائی ٹریفک کے مواصلاتی نظام میں خرابی کے باعث فضائی سفر کا نظام شدید متاثر ہے، جہاں ہزاروں پروازیں منسوخ اور تاخیر کا شکار ہونے سے ملک بھر کے ہوائی اڈوں پر مسافروں کو مشکلات کا سامنا ہے۔ امریکی حکام نے توقع ظاہر کی ہے کہ فضائی آپریشن اتوار کی رات تک بڑی حد تک معمول پر آجائے گا۔
برطانوی خبر رساں ادارے رائٹرز کے مطابق ایوی ایشن ڈیٹا ویب سائٹ فلائٹ اویئر کے اعداد و شمار میں بتایا گیا ہے کہ ہفتے کی رات 9 بج کر 35 منٹ تک امریکا میں 6 ہزار 400 سے زائد پروازیں منسوخ جبکہ 8 ہزار سے زیادہ تاخیر کا شکار ہو چکی تھیں۔ اس سے ایک روز قبل جمعے کو بھی تقریباً 9 ہزار 200 پروازیں منسوخ اور 7 ہزار 500 تاخیر کا شکار ہوئی تھیں، جبکہ اتوار کے لیے بھی 875 پروازیں پہلے ہی منسوخ کی جا چکی تھیں۔
امریکی فیڈرل ایوی ایشن ایڈمنسٹریشن (ایف اے اے) کے سربراہ برائن بیڈفورڈ نے کہا ہے کہ انہیں امید ہے کہ اتوار کی رات تک فضائی آپریشن بڑی حد تک معمول پر آجائے گا۔ انہوں نے مسافروں کو درپیش مشکلات پر معذرت کرتے ہوئے بتایا کہ فضائی نظام اب مستحکم ہے۔
رپورٹ کے مطابق جمعے کو ایف اے اے نے فضائی ٹریفک کے مواصلاتی نظام میں خرابی کے بعد ملک بھر میں پروازوں کی روانگی روکنے کا حکم دیا تھا، جس کے نتیجے میں تقریباً پانچ گھنٹے تک بیشتر فضائی آپریشن معطل رہا۔ یہ 11 ستمبر 2001 کے دہشت گرد حملوں کے بعد امریکا میں فضائی سفر کی طویل ترین ملک گیر بندش تھی۔
ابتدائی طور پر امریکی حکام نے سائبر حملے کے امکان کو بھی نظرانداز نہیں کیا تھا، جس کے بعد وائٹ ہاؤس میں ہنگامی اجلاس منعقد ہوا۔ تاہم امریکی وزیر ٹرانسپورٹ شان ڈفی کے مطابق ابتدائی تحقیقات میں خرابی کا تعلق ایف اے اے کے کنٹریکٹر ایل تھری ہیرس کی جانب سے ایک دور دراز تنصیب میں نیا روٹر نصب کرنے سے سامنے آیا ہے۔
شان ڈفی نے پریس کانفرنس میں کہا کہ حکام اس بات کی تحقیقات کر رہے ہیں کہ آیا یہ مسئلہ عملے کی غلطی، روٹر کی تنصیب میں کسی کوتاہی یا خود آلے میں خرابی کے باعث پیدا ہوا۔ ان کے مطابق فی الحال خرابی کی حتمی وجہ سامنے نہیں آسکی۔
امریکی ایوی ایشن سیفٹی ملازمین کی نمائندہ یونین کے مطابق جمعے کو اپ ڈیٹ کیے گئے دو روٹرز میں مسائل پیدا ہوئے تھے۔ ایک امریکی عہدیدار نے رائٹرز کو بتایا کہ یہ روٹرز ممکنہ طور پر آرکنساس اور ٹیکساس میں نصب کیے گئے تھے۔
ایف اے اے حکام کا کہنا ہے کہ روٹرز کی تنصیب سے قبل حفاظتی جائزہ لیا گیا تھا، تاہم متعلقہ یونین نے دعویٰ کیا کہ اس کے نمائندہ تکنیکی عملے کو ان اپ گریڈز کے عمل میں شامل نہیں کیا گیا تھا، جن کے بعد فضائی آپریشن متاثر ہوا۔
دوسری جانب ایل تھری ہیرس کمپنی نے کہا ہے کہ وہ معاملے کو سنجیدگی سے لے رہی ہے اور تحقیقات میں ایف اے اے کے ساتھ مکمل تعاون کر رہی ہے۔
مواصلاتی نظام میں خرابی کیسے پیدا ہوئی؟
امریکی وزیر ٹرانسپورٹ شان ڈفی کے مطابق جمعے کی دوپہر ایئر ٹریفک کنٹرول مراکز کے ریڈار اور مواصلاتی نظام میں بے قاعدگی پیدا ہوئی۔ روٹرز میں خرابی کے باعث ڈیٹا کا غیر معمولی دباؤ دیگر مواصلاتی مراکز تک بھی منتقل ہوا، جس سے طیاروں کی نگرانی اور ان سے رابطے کا نظام متاثر ہوا۔
انہوں نے بتایا کہ ہر چار سے پانچ سیکنڈ کے دوران ایک ہزار سے زائد کنکشن کی کوششیں ہو رہی تھیں، جس سے فضائی ٹریفک کنٹرول کے نظام پر غیر معمولی دباؤ پڑا۔
شان ڈفی کے مطابق امریکا کے 22 میں سے 17 ایئر ٹریفک کنٹرول مراکز اس خرابی سے متاثر ہوئے۔ یہ مراکز فضائی سفر کے دوران طیاروں کی نقل و حرکت کی نگرانی اور رہنمائی کے ذمہ دار ہوتے ہیں۔
ایف اے اے کے سربراہ برائن بیڈفورڈ نے وضاحت کی کہ کسی بھی مرکز کا رابطہ مکمل طور پر منقطع نہیں ہوا تھا، تاہم ممکنہ حفاظتی خطرات کے پیش نظر ملک بھر میں پروازیں روکنے کا فیصلہ کیا گیا تاکہ مسافروں اور طیاروں کی حفاظت یقینی بنائی جا سکے۔
حکام کے مطابق واقعے کی تحقیقات جاری ہیں اور مواصلاتی نظام میں خرابی کی حتمی وجوہات سامنے آنے کے بعد مزید تفصیلات جاری کی جائیں گی۔
