پنشن کی بحالی کے لیے 15 سال کی شرط لازم نہیں، وفاقی آئینی عدالت کا بڑا فیصلہ

0

نیوز ڈیسک

اسلام آباد: وفاقی آئینی عدالت نے پنجاب روڈ ٹرانسپورٹ کے سابق ملازمین کی پنشن سے متعلق اہم فیصلہ جاری کرتے ہوئے روکی گئی پنشن عمر اور متعلقہ قواعد کے مطابق بحال کرنے اور سابقہ واجبات ادا کرنے کا حکم دے دیا ہے۔

عدالت نے اس کیس میں لاہور ہائیکورٹ کے سنگل اور دو رکنی بینچ کے فیصلے کالعدم قرار دیتے ہوئے ملازمین کو پنشن کی ادائیگی سے متعلق ریلیف فراہم کیا ہے۔

وفاقی آئینی عدالت نے کیس کا 20 صفحات پر مشتمل تحریری فیصلہ جاری کیا، جسے جسٹس حسن اظہر رضوی نے تحریر کیا۔ فیصلے میں واضح کیا گیا کہ ملازمین کی پنشن کی بحالی کا تعین ان کی عمر اور متعلقہ پنشن قواعد کو مدنظر رکھتے ہوئے کیا جائے گا۔

تحریری فیصلے کے مطابق پنشن رولز 1963 میں ایسی کوئی مقررہ شرط موجود نہیں کہ 15 سال مکمل ہونے کے بعد ہی پنشن بحال کی جا سکتی ہے۔ اس لیے پنشن کی بحالی کی مدت 15 سال سے کم یا زیادہ بھی ہو سکتی ہے، جس کا تعین متعلقہ قواعد کے تحت کیا جائے گا۔

عدالت نے قرار دیا کہ آئین کے آرٹیکل 25 کے تحت کسی سابقہ غلط فیصلے کو قانونی نظیر کے طور پر استعمال نہیں کیا جا سکتا۔ ملازمین کو ان کی واجب الادا سابقہ پنشن کے ساتھ سالانہ اضافے کی رقم بھی ادا کرنے کی ہدایت کی گئی ہے۔

واضح رہے کہ پنجاب روڈ ٹرانسپورٹ کے ملازمین نے 1997 میں گولڈن ہینڈ شیک اسکیم کے تحت ملازمتیں چھوڑی تھیں۔ معاہدے کے مطابق ان کی نصف پنشن کی رقم 15 سال کے لیے یکمشت ادا کی جانی تھی، جبکہ باقی نصف ماہانہ بنیادوں پر ملنا تھی۔ معاہدے میں 15 سال بعد یکمشت ادا کی گئی نصف پنشن کی بحالی کی بھی شق شامل تھی۔

تاہم پنشن کی بحالی اور ادائیگی کے معاملے پر تنازع پیدا ہونے کے بعد کیس عدالتوں میں پہنچا، جہاں لاہور ہائیکورٹ کے فیصلوں کو اب وفاقی آئینی عدالت نے کالعدم قرار دے دیا ہے۔

تازہ فیصلے سے متاثرہ سابق ملازمین کو نہ صرف پنشن کی بحالی بلکہ گزشتہ واجبات اور سالانہ اضافوں کی ادائیگی کی بھی قانونی بنیاد فراہم ہو گئی ہے۔

Leave A Reply

Your email address will not be published.