نیوز ڈیسک
میکسیکو: میکسیکو میں امریکی سرحد کے قریب آسمان پر پرواز کرتی ایک پراسرار مخلوق کی ویڈیوز نے سوشل میڈیا پر تہلکہ مچا دیا ہے۔ کوئی اسے لاکھوں سال پہلے معدوم ہونے والا دیوہیکل اڑنے والا جانور قرار دے رہا ہے تو کسی کے نزدیک یہ مصنوعی ذہانت (اے آئی) سے تیار کردہ ایک ڈیجیٹل فریب ہے۔
برطانوی جریدے ’دی سن‘ کے مطابق یہ ویڈیوز میکسیکو کے سرحدی شہر سیوداد خواریز کے قریب ریکارڈ کی گئی ہیں۔
ایک ویڈیو میں رات کے وقت سی سی ٹی وی کیمرے میں سیاہ رنگ کی ایک غیر معمولی مخلوق فضا میں پرواز کرتی دکھائی دیتی ہے، جس کے بڑے بڑے پر اور سر کے پچھلے حصے میں ابھری ہوئی ساخت نمایاں ہے۔ دوسری ویڈیو میں اسی نوعیت کی مخلوق دن کے وقت عمارتوں کے اوپر سے گزرتی نظر آتی ہے۔
ویڈیوز وائرل ہوتے ہی سوشل میڈیا پر قیاس آرائیوں کا سلسلہ شروع ہوگیا۔ بعض صارفین نے اس کی جسامت اور ساخت کو کروڑوں سال پہلے معدوم ہونے والے اڑنے والے رینگنے والے جانور ’پٹیروڈیکٹائل‘ سے تشبیہ دی، جب کہ دیگر نے سوال اٹھایا کہ کہیں یہ اے آئی ٹیکنالوجی کے ذریعے تخلیق کیا گیا کوئی ڈیجیٹل منظر تو نہیں۔
کیا آسمان پر واقعی کوئی معدوم مخلوق واپس آگئی؟
میکسیکو کے معروف یو ایف او محقق جائمے موسان نے بھی یہ ویڈیوز اپنے سوشل میڈیا اکاؤنٹس پر شیئر کرتے ہوئے ایک دلچسپ سوال اٹھایا کہ کیا سیوداد خواریز کے علاقے میں کسی دوسری جہت کا راستہ موجود ہے، جہاں سے یہ پراسرار مخلوق زمین پر پہنچی ہو؟
موسان نے اپنے ٹی وی پروگرام میں ایک ویڈیو دکھاتے ہوئے اس مخلوق کو ’پٹیرانوڈون‘ قرار دیا، جو ایک دیوہیکل اڑنے والا رینگنے والا جانور تھا اور تقریباً 6 کروڑ 60 لاکھ سال قبل معدوم ہوگیا تھا۔
انہوں نے ویڈیوز کو مستند قرار دیتے ہوئے دعویٰ کیا کہ ان کے پس منظر میں امریکی ریاست ٹیکساس کے فرینکلن پہاڑ بھی دکھائی دیتے ہیں۔ تاہم، ویڈیو میں کسی حقیقی مقام کی شناخت اس میں نظر آنے والی مخلوق کی حقیقت یا شناخت کا ثبوت نہیں ہے۔
حکام نے پراسرار مخلوق کا دعویٰ مسترد کردیا
دوسری جانب مقامی حکام نے ان ویڈیوز کو غیر معمولی مخلوق کی موجودگی کا ثبوت ماننے سے انکار کردیا ہے۔
سیوداد خواریز کے محکمہ شہری تحفظ کے سربراہ سرجیو روڈریگز نے انہیں محض ڈیجیٹل تفریح قرار دیتے ہوئے کہا کہ ویڈیوز کے حقیقی ہونے کی تصدیق کے لیے کوئی شواہد موجود نہیں۔
ادھر بعض انٹرنیٹ صارفین اور مبصرین کا خیال ہے کہ ویڈیوز میں دکھائی دینے والی چیز کوئی بڑا پرندہ ہوسکتی ہے، مثلاً نیل کنٹھ یا فریگیٹ برڈ، جو کسی غیر معمولی زاویے سے کیمرے میں ریکارڈ ہوا ہو۔ دیگر افراد نے ان مناظر کو اے آئی سے تیار کردہ قرار دیا ہے۔
فی الحال نہ تو ویڈیوز کی آزادانہ طور پر تصدیق ہوسکی ہے اور نہ ہی ان میں نظر آنے والی مخلوق کی شناخت سامنے آئی ہے۔ یوں میکسیکو کے آسمان پر دکھائی دینے والی یہ پراسرار شے حقیقت، ٹیکنالوجی اور قیاس آرائیوں کے درمیان ایک معمہ بنی ہوئی ہے۔
