اسلام آباد میں ٹریفک الرٹ، آج کون سے راستے بند ہوں گے؟

0

نیوز ڈیسک

اسلام آباد: کرکٹ ٹیموں کی آمدورفت کے پیش نظر اسلام آباد کی اہم شاہراہوں، خصوصاً ایکسپریس ہائی وے اور سری نگر ہائی وے پر مختلف اوقات میں ٹریفک ڈائیورشنز نافذ کی جائیں گی۔

اسلام آباد پولیس کے ترجمان کے مطابق 17 نومبر 2026 کو شہریوں کی سہولت کے لیے متبادل راستوں کا اعلان کیا گیا ہے تاکہ ٹریفک کی روانی برقرار رکھی جا سکے۔

ٹریفک ایڈوائزری کے مطابق سری نگر ہائی وے پر سفر کرنے والے شہری سہروردی روڈ، جی ایٹ اور جی نائن کی سروس روڈز اور زیرو پوائنٹ کا متبادل راستہ اختیار کریں۔

فیض آباد جانے والی ٹریفک کو فیصل ایونیو جبکہ نائنتھ ایونیو جانے والے شہریوں کو سروس روڈ ایسٹ استعمال کرنے کی ہدایت کی گئی ہے۔

اسی طرح کورال سے اسلام آباد آنے والے شہری پرانا ایئرپورٹ، راول روڈ، راولپنڈی مری روڈ، آئی جے پی روڈ اور فقیر ایپی روڈ استعمال کریں۔

پولیس ترجمان کے مطابق کورال ایکسپریس ہائی وے، مری روڈ یا کلب روڈ بند ہونے کی صورت میں شہری لہتراڑ روڈ اور پارک روڈ کا متبادل راستہ اختیار کریں۔

نیو اسلام آباد ایئرپورٹ اور پشاور روڈ جانے والے شہریوں کو جناح ایونیو اور مارگلہ روڈ استعمال کرنے کی ہدایت کی گئی ہے، جبکہ بہارہ کہو سے اسلام آباد آنے والے شہری بنی گالا اور پارک روڈ کے ذریعے اپنی منزل تک پہنچ سکتے ہیں۔

شہریوں کے لیے اہم ہدایات

چیف ٹریفک آفیسر کائنات اظہر خان نے کہا ہے کہ ٹریفک ڈائیورشنز کے دوران مختلف شاہراہوں پر گاڑیوں کی رفتار سست رہنے کا امکان ہے، اس لیے شہری سفری مشکلات سے بچنے کے لیے اپنے سفر میں 20 سے 25 منٹ اضافی رکھیں۔

انہوں نے کہا کہ اسلام آباد ٹریفک پولیس کے افسران شہریوں کی رہنمائی اور سہولت کے لیے مختلف مقامات پر موجود ہوں گے۔

شہریوں کو مزید ٹریفک معلومات کے لیے ایف ایم 92.4 سننے اور اسلام آباد پولیس کے سوشل میڈیا پیجز فالو کرنے کی ہدایت بھی کی گئی ہے۔

Leave A Reply

Your email address will not be published.