نیوز ڈیسک
اسلام آباد: جنوبی امریکی ملک پیرو میں بغیر ڈنک والی شہد کی مکھیوں کو قانونی طور پر تحفظ اور انسانوں سے مشابہ بنیادی حقوق دینے کا تاریخی فیصلہ کیا گیا ہے، جس کے تحت یہ حشرات قانونی حقوق حاصل کرنے والی دنیا کی پہلی نسل بن گئی ہیں۔
امریکی نشریاتی ادارے سی این این کے مطابق پیرو کے دو مقامی صوبوں ستیپو اور ناؤٹا کی میونسپل حکومتوں نے ماحولیاتی تنظیموں، سائنس دانوں اور مقامی اشانینکا قبائل کی طویل جدوجہد کے بعد ’ایمازونین اسٹنگ لیس بیز کے حقوق کا اعلامیہ‘ منظور کیا ہے۔
اس قانون کے تحت ان مکھیوں کو زندہ رہنے، افزائش نسل کرنے، آلودگی سے پاک ماحول میں رہنے اور اپنے حقوق کی خلاف ورزی کی صورت میں عدالتوں میں قانونی نمائندگی حاصل کرنے کا حق دیا گیا ہے۔
دنیا بھر میں بغیر ڈنک والی شہد کی مکھیوں کی 600 سے زائد اقسام پائی جاتی ہیں، جن میں سے 175 سے زیادہ اقسام پیرو کے ایمازون کے برساتی جنگلات میں موجود ہیں۔ یہ ننھی مکھیاں، جن کی جسامت تقریباً پانچ ملی میٹر تک ہوتی ہے، پودوں کی افزائش اور جنگلات کے ماحولیاتی توازن کو برقرار رکھنے میں اہم کردار ادا کرتی ہیں۔
اس اقدام کے پس منظر میں کیمیکل بایولوجسٹ اور غیر منافع بخش ادارے ’ایمازون ریسرچ انٹرنیشنل‘ کی بانی روزا واسکیز ایسپینوزا کی نمایاں کاوشیں شامل ہیں، جنہیں اس حوالے سے خدمات پر 2026 کے ’رولیکس ایوارڈز لاریٹ‘ سے بھی نوازا گیا۔
ایسپینوزا کے مطابق تحقیق کے دوران انہیں معلوم ہوا کہ پیرو کے موجودہ قوانین میں ان مقامی مکھیوں کا کوئی واضح ذکر نہیں تھا، حالانکہ یہ ملکی حیاتیاتی تنوع اور ماحولیاتی نظام کا اہم حصہ ہیں۔ ان کا کہنا تھا کہ یہ مکھیاں عدالتوں میں خود اپنا دفاع نہیں کر سکتیں، تاہم انسان ان بے زبان مخلوقات کے حقوق کے لیے آواز اٹھا سکتے ہیں۔
دلچسپ بات یہ ہے کہ ’اسٹنگ لیس‘ کہلانے کے باوجود ان مکھیوں میں ڈنک موجود ہوتا ہے، تاہم وہ غیر فعال ہوتا ہے۔ یہ اپنے چھتوں کے دفاع کے لیے بھنبھناہٹ اور کاٹنے کا طریقہ اختیار کرتی ہیں۔
رپورٹ کے مطابق اس قانون سازی میں جدید سائنسی تحقیق کو مقامی اشانینکا قبائل کی صدیوں پرانی روایتی دانش کے ساتھ یکجا کیا گیا ہے۔ مقامی آبادی ان مکھیوں کے شہد کو روایتی ادویات اور خوراک کے لیے استعمال کرتی ہے، جبکہ فصلوں اور پودوں کی پولینیشن میں بھی ان کا اہم کردار ہے۔
نئے قانون کے تحت ماحولیاتی اور حشرات کے حقوق کے لیے کام کرنے والی تنظیمیں ان مکھیوں کے قدرتی مسکن کو نقصان پہنچانے، خصوصاً محفوظ چھتوں والے درختوں کی کٹائی جیسے اقدامات کے خلاف عدالتوں سے رجوع کر سکیں گی۔
اگرچہ تاحال اس قانون کے تحت کوئی مقدمہ دائر نہیں کیا گیا، تاہم مقامی حکام اور کمیونٹیز نے مکھیوں کے تحفظ کے لیے عملی اقدامات شروع کر دیے ہیں۔ ان میں آگاہی ورکشاپس، اسکولوں کے نصاب میں تحفظِ مکھیوں سے متعلق موضوعات کی شمولیت اور مقامی منڈیوں کا قیام شامل ہے۔
پیرو کے کوزکو خطے کی مزید دو میونسپلٹیوں نے بھی اس قانونی ماڈل کو اپنایا ہے، جبکہ چھ براعظموں کے 14 ممالک کی تنظیموں نے اپنی مقامی مکھیوں کے تحفظ کے لیے اس اقدام میں دلچسپی ظاہر کی ہے۔
