صدرِ مملکت کی خیبر پختونخوا کے 5 آرڈیننسز اور 12 ترمیمی بلوں کی منظوری

0

نیوز ڈیسک 

اسلام آباد: صدرِ مملکت آصف علی زرداری نے خیبر پختونخوا سے متعلق 5 آرڈیننسز اور مختلف شعبوں سے متعلق 12 ترمیمی بلوں کی منظوری دے دی ہے، جس کے بعد منظور شدہ بل باقاعدہ قانون کا حصہ بن گئے ہیں۔

ایوانِ صدر سے جاری اعلامیے کے مطابق صدرِ مملکت نے خیبر پختونخوا اسپیشل انیشیٹوز آرڈیننس 2026 (مخصوص اضلاع) اور خیبر پختونخوا اسپیشل انیشیٹوز آرڈیننس 2026 (مخصوص اضلاع کے علاوہ) کی منظوری دی ہے۔

اس کے علاوہ خیبر پختونخوا صوبائی اسمبلی (اختیارات، استثنیٰ اور مراعات) (ترمیمی) آرڈیننس 2026، خیبر پختونخوا سوسائٹیز (رجسٹریشن) (ترمیمی) آرڈیننس 2026 اور خیبر پختونخوا اسپیکر و ڈپٹی اسپیکر (تنخواہوں، الاؤنسز اور مراعات) آرڈیننس 2026 کی بھی توثیق کردی گئی ہے۔

واضح رہے کہ وفاقی کابینہ نے گزشتہ روز وزارتِ قانون و انصاف کی جانب سے پیش کردہ سمری سرکولیشن کے ذریعے منظور کی تھی، جس میں خیبر پختونخوا سے متعلق پانچوں آرڈیننسز کی منظوری کی سفارش کی گئی تھی۔

دوسری جانب صدرِ مملکت نے تعلیم، تحقیق، سائنس و ٹیکنالوجی اور سیاحت سمیت مختلف شعبوں میں اصلاحات سے متعلق 12 ترمیمی بلوں پر بھی دستخط کردیے ہیں۔

ایوانِ صدر کے مطابق منظور شدہ قانون سازی میں آرکائیول میٹیریل (تحفظ اور برآمدات پر کنٹرول) ترمیمی بل 2026، پاکستان اسٹڈی سینٹرز ترمیمی بل 2026 اور ایریا آف اسٹڈی سینٹرز ترمیمی بل 2026 شامل ہیں۔

اسی طرح سینٹرز آف ایکسی لینس ترمیمی بل 2026، فیڈرل بورڈ آف انٹرمیڈیٹ اینڈ سیکنڈری ایجوکیشن ترمیمی بل 2026 اور ہائر ایجوکیشن کمیشن ترمیمی بل 2026 کی بھی منظوری دے دی گئی ہے۔

اعلامیے کے مطابق اعلیٰ تعلیم اور فنی تعلیم کے اداروں سے متعلق نیشنل کالج آف آرٹس انسٹی ٹیوٹ ترمیمی بل 2026، نیشنل ٹیکسٹائل یونیورسٹی ترمیمی بل 2026 اور این ایف سی انسٹی ٹیوٹ آف انجینئرنگ اینڈ ٹیکنالوجی ملتان ترمیمی بل 2026 بھی منظور کرلیے گئے ہیں۔

مزید برآں صدرِ مملکت نے نیشنل رحمت للعالمین و خاتم النبیین اتھارٹی ترمیمی بل 2026، پاکستان کونسل فار سائنس اینڈ ٹیکنالوجی ترمیمی بل 2026 اور پاکستان ٹورسٹ گائیڈز ترمیمی بل 2026 کی بھی توثیق کردی ہے۔

اعلامیے میں کہا گیا ہے کہ ان قوانین کے نفاذ کے لیے باقاعدہ گزٹ نوٹیفکیشن جاری کیا جائے گا۔

Leave A Reply

Your email address will not be published.