نیوز ڈیسک
لاہور: پاکستان کرکٹ بورڈ (پی سی بی) نے 38 کھلاڑیوں کے سینٹرل کنٹریکٹس کا اعلان کردیا ہے، تاہم سابق کپتان محمد رضوان اور اوپنر صائم ایوب کنٹریکٹ حاصل کرنے میں ناکام رہے ہیں۔ چیف سلیکٹر عاقب جاوید نے محمد رضوان کی قومی ٹیم میں واپسی کے حوالے سے بھی اہم وضاحت کردی ہے۔
پی سی بی کی جانب سے جاری کردہ فہرست میں کھلاڑیوں کو ٹیسٹ، ون ڈے، ٹی 20 انٹرنیشنل اور ڈیویلپمنٹ سمیت چار کیٹیگریز میں تقسیم کیا گیا ہے۔ نئے کنٹریکٹ نظام کا مقصد کھلاڑیوں کو اپنے متعلقہ فارمیٹس پر توجہ مرکوز کرنے کا موقع فراہم کرنا ہے۔
چیف سلیکٹر عاقب جاوید نے محمد رضوان کے مستقبل سے متعلق گفتگو کرتے ہوئے کہا کہ پاکستان کرکٹ کے لیے ان کی خدمات بدستور موجود ہیں اور جیسے ہی حالات سازگار ہوں گے، انہیں دوبارہ قومی ٹیم میں منتخب کیا جاسکتا ہے۔
عاقب جاوید نے واضح کیا کہ بابر اعظم اور سلمان علی آغا ٹی 20 کرکٹ سے باہر نہیں ہوئے اور قومی ٹیم کی سلیکشن کا سینٹرل کنٹریکٹ سے کوئی تعلق نہیں۔ ان کا کہنا تھا کہ اچھی کارکردگی دکھانے والا کوئی بھی کھلاڑی کسی بھی فارمیٹ میں قومی ٹیم کی نمائندگی کرسکتا ہے۔
ان کے مطابق فارمیٹ کی بنیاد پر سینٹرل کنٹریکٹس متعارف کرانے کا بنیادی مقصد کھلاڑیوں کو اپنے متعلقہ فارمیٹ پر زیادہ توجہ دینے کا موقع فراہم کرنا ہے۔
پی سی بی کی جاری کردہ فہرست کے مطابق بابر اعظم اور سلمان علی آغا کو ٹیسٹ اور ون ڈے فارمیٹس کے کنٹریکٹس دیے گئے ہیں، جب کہ ٹیسٹ کیٹیگری میں اذان اویس، محمد عباس، ساجد خان اور سعود شکیل بھی شامل ہیں۔
ون ڈے اور ٹی 20 انٹرنیشنل دونوں فارمیٹس کے کنٹریکٹس حاصل کرنے والوں میں ابرار احمد، فخر زمان، فہیم اشرف، حارث رؤف، شاہین شاہ آفریدی اور عرفات منہاس شامل ہیں۔
ٹی 20 انٹرنیشنل کیٹیگری میں حسن نواز، معاذ صداقت، محمد سلمان مرزا، نسیم شاہ، صاحبزادہ فرحان، شاداب خان اور عثمان طارق کو جگہ دی گئی ہے۔
دوسری جانب مستقبل کے کرکٹرز کی تیاری اور نئے ٹیلنٹ کو آگے لانے کے لیے ڈیویلپمنٹ کیٹیگری میں 19 کھلاڑیوں کو شامل کیا گیا ہے۔
اس کیٹیگری میں عبدالصمد، عبداللہ فضل، احمد دانیال، علی رضا، فرحان یوسف، حنین شاہ، محمد طحہٰ، محمد طیب عارف، محمد غازی غوری، محمد عمران رندھاوا، رضا اللہ، سعد بیگ، سعد مسعود، سمیر منہاس، شاہ زیب خان، شامل حسین، سفیان مقیم اور عبید شاہ شامل ہیں۔
