خیبرپختونخوا کے 12 اضلاع میں 1916 اساتذہ غیر حاضر، 3 روز میں وضاحت طلب

0

نیوز ڈیسک

پشاور: خیبرپختونخوا کے 12 نامزد اضلاع میں 1916 اساتذہ کی غیر مجاز غیر حاضری کا انکشاف ہوا ہے، جس پر محکمہ تعلیم نے کارروائی کا فیصلہ کرتے ہوئے متعلقہ افسران کو غیر حاضر اساتذہ سے 3 روز کے اندر تحریری وضاحت طلب کرنے کی ہدایت کردی ہے۔

اس حوالے سے ایڈیشنل چیف سیکرٹری نامزد اضلاع یحییٰ اخونزادہ کی زیر صدارت اجلاس منعقد ہوا، جس میں اساتذہ کی غیر حاضری اور تعلیمی اداروں کی کارکردگی سے متعلق صورتحال کا جائزہ لیا گیا۔

اجلاس میں تمام متعلقہ ڈسٹرکٹ ایجوکیشن افسران کو ہدایت کی گئی کہ غیر حاضر اساتذہ سے تین روز کے اندر تحریری جواب طلب کیا جائے، جب کہ تسلی بخش وضاحت پیش نہ کرنے والے اور مسلسل غیر حاضر رہنے والے اساتذہ کے خلاف قواعد و ضوابط کے مطابق تادیبی کارروائی عمل میں لائی جائے۔

اجلاس میں جاری مراسلے کے مطابق اساتذہ کی غیر حاضری سے بچوں کی تعلیم، تدریسی عمل اور تعلیمی اداروں کی مجموعی کارکردگی متاثر ہو رہی ہے۔ سیکرٹری تعلیم کو بھی ہدایت کی گئی ہے کہ کارروائی سے متعلق تفصیلی رپورٹ مقررہ وقت کے اندر سیکرٹریٹ کو ارسال کریں۔

سرکاری رپورٹ کے مطابق 12 نامزد اضلاع میں غیر حاضر اساتذہ کی تعداد 1916 ہے، جن میں 1042 خواتین اور 874 مرد اساتذہ شامل ہیں۔

اعداد و شمار کے مطابق شمالی وزیرستان میں سب سے زیادہ 419 اساتذہ غیر حاضر پائے گئے، جب کہ بنوں میں 348 اور جنوبی وزیرستان اپر میں 243 اساتذہ کی غیر حاضری رپورٹ ہوئی ہے۔

اسی طرح ڈیرہ اسماعیل خان میں 204، لکی مروت میں 150، ضلع کرم میں 130 اور خیبر میں 114 اساتذہ غیر حاضر ہیں۔ باجوڑ میں 88، مہمند میں 70، اورکزئی میں 66 اور ٹانک میں 52 اساتذہ کی غیر حاضری سامنے آئی ہے، جب کہ جنوبی وزیرستان لوئر میں 32 اساتذہ غیر حاضر پائے گئے۔

رپورٹ میں بتایا گیا ہے کہ غیر حاضر اساتذہ میں سب سے بڑی تعداد 620 پرائمری اسکول ٹیچرز (PST) کی ہے، جب کہ 288 پرائمری اسکول ہیڈ ٹیچرز (PSHT) بھی غیر حاضر اساتذہ میں شامل ہیں۔

اس کے علاوہ 153 سرٹیفائیڈ ٹیچرز (CT) اور 121 سیکنڈری اسکول ٹیچرز (SST) جنرل بھی غیر حاضر پائے گئے ہیں۔

دوسری جانب سیکرٹری تعلیم ڈاکٹر قاسم نے اساتذہ کی غیر حاضری پر سخت تشویش کا اظہار کرتے ہوئے کہا ہے کہ مسلسل غیر موجودگی سے بچوں کا تعلیمی مستقبل، تدریسی سرگرمیاں اور تعلیمی اداروں کی مجموعی کارکردگی متاثر ہو رہی ہے۔

انہوں نے کہا کہ غیر حاضر اساتذہ بچوں کے مستقبل سے کھیل رہے ہیں اور تعلیمی اداروں میں اساتذہ کی حاضری یقینی بنانا محکمہ تعلیم کی اولین ذمہ داری ہے۔ ان کا مزید کہنا تھا کہ فرائض میں غفلت اور غیر مجاز غیر حاضری کسی صورت برداشت نہیں کی جائے گی۔

Leave A Reply

Your email address will not be published.