کراچی کےدن خشک، راتیں سرد بڑھنے کی پیش گوئی

0

نیوز ڈیسک

کراچی: محکمہ موسمیات (پی ایم ڈی) نے کراچی اور اس کے گردونواح میں آئندہ ہفتے موسم خشک رہنے کی پیش گوئی کرتے ہوئے رات اور صبح کے اوقات میں سردی کی شدت بڑھنے کا امکان ظاہر کیا ہے۔

محکمہ موسمیات کے مطابق شہر میں دن کے وقت موسم معمول کے مطابق رہے گا، آسمان صاف اور دھوپ معتدل رہنے کا امکان ہے، تاہم سورج غروب ہونے کے بعد درجہ حرارت میں کمی کے باعث موسم خنک ہوجائے گا۔

حکام کا کہنا ہے کہ شمالی علاقوں سے آنے والی ہواؤں کے باعث کراچی سمیت ساحلی علاقوں میں بھی موسم پر اثرات مرتب ہو رہے ہیں، جس کے نتیجے میں رات کے اوقات میں سردی کا احساس بڑھ سکتا ہے۔

دوسری جانب ماہرین صحت نے شہریوں، بالخصوص بچوں اور بزرگوں کو صبح سویرے اور رات کے وقت احتیاط برتنے کا مشورہ دیا ہے تاکہ درجہ حرارت میں تبدیلی کے باعث موسمی بیماریوں سے محفوظ رہا جاسکے۔

محکمہ موسمیات کے مطابق شہر میں موسم کی موجودہ صورتحال پورے ہفتے برقرار رہنے کا امکان ہے، جبکہ فی الحال بارش یا موسم میں کسی بڑی تبدیلی کی پیش گوئی نہیں کی گئی۔

Leave A Reply

Your email address will not be published.