نیوز ڈیسک
پشاور: کاؤنٹر ٹیررازم ڈیپارٹمنٹ (سی ٹی ڈی) اور سیکیورٹی فورسز نے پشاور کے مضافاتی علاقے متنی میں انٹیلی جنس بنیادوں پر کارروائی کرتے ہوئے فائرنگ کے تبادلے میں 3 دہشت گردوں کو ہلاک کردیا۔
ابتدائی سیکیورٹی رپورٹس کے مطابق کارروائی علاقے میں دہشت گردوں کی موجودگی اور تخریبی سرگرمیوں کی منصوبہ بندی سے متعلق خفیہ اطلاعات ملنے پر کی گئی۔
حکام کے مطابق سیکیورٹی اہلکاروں نے مشتبہ دہشت گردوں کے ٹھکانے کا گھیراؤ کیا تو وہاں موجود افراد نے فائرنگ شروع کردی، جس کے بعد دونوں جانب سے شدید فائرنگ کا تبادلہ ہوا۔ جوابی کارروائی میں تینوں دہشت گرد مارے گئے۔
فائرنگ کا تبادلہ ختم ہونے کے بعد سیکیورٹی فورسز نے علاقے میں سرچ اور کلیئرنس آپریشن شروع کردیا تاکہ کسی ممکنہ خطرے کا خاتمہ اور اسلحہ و گولہ بارود کی موجودگی کا پتا لگایا جاسکے۔
دوسری جانب ہلاک دہشت گردوں کی شناخت اور ان کے ممکنہ سہولت کاروں سمیت دیگر نیٹ ورکس سے روابط کا پتا لگانے کے لیے تحقیقات جاری ہیں۔
سیکیورٹی حکام کے مطابق خیبرپختونخوا میں دہشت گردی کے خاتمے اور شہریوں کے تحفظ کے لیے انٹیلی جنس بنیادوں پر کارروائیاں جاری رکھی جائیں گی۔
