امریکا، ایران تنازع پھیلنے کا خدشہ ہے، بلاول بھٹو نے خبردار کردیا

0

نیوز ڈیسک

اسلام آباد: پاکستان پیپلز پارٹی کے چیئرمین اور سابق وزیرِ خارجہ بلاول بھٹو زرداری نے افغانستان میں دہشت گرد گروہوں کی موجودگی کو پاکستان کے لیے ایک بڑا سکیورٹی چیلنج قرار دیتے ہوئے کہا ہے کہ امریکا اور ایران کے درمیان تنازع کا حل مذاکرات اور سفارت کاری کے ذریعے تلاش کیا جانا چاہیے۔

ترک نشریاتی ادارے ٹی آر ٹی کو انٹرویو دیتے ہوئے بلاول بھٹو زرداری نے کہا کہ پاکستان عالمی تنازعات کے حل کے لیے بات چیت اور سفارتی کوششوں پر یقین رکھتا ہے اور امریکا اور ایران کے درمیان ابتدائی جنگ بندی ممکن بنانے سمیت دونوں ممالک کے درمیان مذاکرات کے تسلسل میں اہم کردار ادا کر چکا ہے۔

انہوں نے کہا کہ پاکستان اب بھی مذاکراتی عمل میں فعال کردار ادا کر رہا ہے، کیونکہ امریکا اور ایران کے درمیان تنازع کے اثرات صرف سکیورٹی اور انسانی بحران تک محدود نہیں بلکہ عالمی معیشت بھی اس سے متاثر ہو رہی ہے۔

بلاول بھٹو زرداری کا کہنا تھا کہ پاکستان خطے میں پائیدار امن کا خواہاں ہے اور تمام تنازعات کو مذاکرات کے ذریعے حل کرنے کا حامی ہے۔ انہوں نے خبردار کیا کہ اگر سفارتی کوششیں ناکام ہوئیں تو تنازع مزید شدت اختیار کر سکتا ہے اور اس کے اثرات موجودہ جغرافیائی حدود سے آگے پھیلنے کا خدشہ ہے۔

ان کے مطابق امریکا اور ایران کے درمیان قابلِ قبول معاہدہ جلد طے پانا دونوں ممالک سمیت پوری عالمی برادری کے مفاد میں ہے، جبکہ عالمی معیشت کو درپیش چیلنجز سے نمٹنے کے لیے بھی اس تنازع کا فوری حل ضروری ہے۔

افغانستان کی صورتِ حال پر گفتگو کرتے ہوئے سابق وزیرِ خارجہ نے کہا کہ امریکی افواج کے انخلا کے بعد افغانستان میں چھوڑا گیا جدید اسلحہ دہشت گرد عناصر کے ہاتھ لگ گیا، جبکہ وہاں دہشت گرد گروہوں کی موجودگی پاکستان کی سلامتی کے لیے ایک سنگین چیلنج بنی ہوئی ہے۔

پاکستان کے عالمی تعلقات پر بات کرتے ہوئے بلاول بھٹو زرداری نے کہا کہ پاکستان امریکا اور چین کے درمیان پل کا کردار ادا کرتا رہے گا۔ 

ان کا کہنا تھا کہ اسلام آباد عالمی طاقتوں کے درمیان محاذ آرائی کے بجائے تعاون اور مثبت روابط کو فروغ دینے کا خواہاں ہے۔

علاقائی دفاعی اور اقتصادی تعاون کے حوالے سے انہوں نے پاکستان، سعودی عرب اور ترکیہ کے درمیان دفاعی شراکت داری کو خطے کے استحکام کے لیے اہم قرار دیا۔

بلاول بھٹو زرداری نے مزید کہا کہ پاکستان اور ترکیہ اپنے دفاعی تعلقات کو مزید مضبوط بنانے کے ساتھ ساتھ تجارت اور معیشت سمیت دیگر شعبوں میں بھی باہمی تعاون بڑھانے کے خواہاں ہیں۔

Leave A Reply

Your email address will not be published.