پاکستانی کپتان کی حاضر دماغی، ٹاس کے فیصلے پر میچ ریفری کو یوٹرن لینا پڑ گیا

0

 

نیوز ڈیسک 

دوحہ: ایشیا کپ رائزنگ اسٹارز کے گروپ میچ میں پاکستان شاہینز کے کپتان عبدالصمد کی حاضر دماغی نے ٹاس کے موقع پر میچ ریفری کو اپنا فیصلہ تبدیل کرنے پر مجبور کردیا، جس کے نتیجے میں پاکستان کو ٹاس کا فاتح قرار دے دیا گیا۔

قطر کے دارالحکومت دوحہ میں پاکستان اور بھارت کی اے ٹیموں کے درمیان مقابلے سے قبل ٹاس کے لیے دونوں ٹیموں کے کپتان عبدالصمد اور تلک ورما میدان میں آئے۔

ٹاس کے دوران میچ ریفری نے سکہ اچھالا تو پاکستانی کپتان عبدالصمد نے ہیڈز کی کال دی، تاہم سکہ زمین پر گرنے کے بعد ریفری نے ٹیلز قرار دیتے ہوئے بھارتی کپتان تلک ورما کو ٹاس کا فاتح قرار دے دیا

اس موقع پر دونوں کپتانوں نے سکے کا بغور جائزہ لیا، جس کے بعد عبدالصمد نے میچ ریفری کی توجہ اس جانب مبذول کرائی کہ سکہ ان کی کال کے مطابق گرا ہے اور ٹاس پاکستان نے جیتا ہے۔

دوبارہ جانچ پڑتال پر پاکستانی کپتان کا مؤقف درست ثابت ہوا، جس کے بعد میچ ریفری کو اپنا فیصلہ واپس لیتے ہوئے پاکستان شاہینز کو ٹاس کا فاتح قرار دینا پڑا۔

دریں اثنا ٹاس اور ابتدائی انٹرویوز کے دوران دونوں ٹیموں کے کپتانوں کے درمیان روایتی مصافحہ بھی دیکھنے میں نہیں آیا۔

ٹاس جیتنے کے بعد عبدالصمد نے پہلے بیٹنگ کرنے کا فیصلہ کیا۔ ان کا کہنا تھا کہ پچ خشک دکھائی دے رہی ہے، جبکہ ٹیم کے بلے باز اور بولرز بھی پُراعتماد ہیں۔ انہوں نے امید ظاہر کی کہ شائقین کو ایک دلچسپ مقابلہ دیکھنے کو ملے گا۔

دوسری جانب بھارتی کپتان تلک ورما نے کہا کہ ان کی ٹیم بھی پہلے بیٹنگ کرنا چاہتی تھی۔ ان کا کہنا تھا کہ شائقین کے لیے یہ ایک دلچسپ مقابلہ ہے، تاہم ان کی ٹیم اسے ایک عام میچ کی طرح لے رہی ہے۔

دونوں ٹیموں نے اپنے گزشتہ میچوں کی فاتح الیون برقرار رکھتے ہوئے کوئی تبدیلی نہیں کی۔ پاکستان اور بھارت گروپ بی میں شامل ہیں، جس میں نیپال اور متحدہ عرب امارات کی ٹیمیں بھی موجود ہیں۔

پاکستان شاہینز نے ٹورنامنٹ کے اپنے افتتاحی میچ میں متحدہ عرب امارات کو 61 رنز سے شکست دے کر فاتحانہ آغاز کیا تھا۔ پاکستان نے پہلے بیٹنگ کرتے ہوئے 46.4 اوورز میں 245 رنز بنائے، جس کے جواب میں یو اے ای کی پوری ٹیم 40.5 اوورز میں 184 رنز پر آؤٹ ہوگئی تھی۔

واضح رہے کہ 19 سے 29 نومبر تک قطر میں جاری 50 اوورز کے ایشیا کپ رائزنگ اسٹارز ٹورنامنٹ میں آٹھ ٹیمیں حصہ لے رہی ہیں۔ پاکستان شاہینز ایونٹ میں دفاعی چیمپئن کی حیثیت سے شریک ہے اور اپنا اگلا گروپ میچ 24 نومبر کو نیپال کے خلاف کھیلے گی۔

ٹورنامنٹ کے دونوں گروپس سے ابتدائی دو پوزیشنز حاصل کرنے والی ٹیمیں سیمی فائنل میں جگہ بنائیں گی، جبکہ ایونٹ کا فائنل 29 نومبر کو کھیلا جائے گا۔

Leave A Reply

Your email address will not be published.