لاہور:دنیا کے آلودہ ترین شہروں میں لاہور ایک بار پھر سرفہرست ہے، جس کے نتیجے میں حکومت پنجاب نے آج سے ایک ہفتے کے لیے پانچویں جماعت تک کے اسکول بند کرنے کا فیصلہ کیا ہے۔
سینئر وزیر مریم اورنگزیب نے لاہور میں پریس کانفرنس کے دوران اعلان کیا کہ اسموگ کی شدت کے پیش نظر سرکاری اور نجی دونوں قسم کے اسکولوں میں تعطیلات ہوں گی۔
یہ اقدام پانچویں جماعت تک کے طلباء کے لیے ایک ہفتے کی چھٹیوں کی صورت میں عمل میں لایا گیا ہے۔
مریم اورنگزیب نے مزید کہا کہ بعض سازشی عناصر نے وزیراعلیٰ کی کلائمٹ ڈپلومیسی پر سیاست کرنے کی کوشش کی۔
انہوں نے بتایا کہ لاہور میں صرف مون سون کے دوران صورتحال بہتر ہوتی ہے، جبکہ پورے سال میں شہر کا ایئر کوالٹی انڈیکس (اے کیو آئی) 275 دن غیر صحت مند رہتا ہے۔ دہلی سے آنے والی ہواؤں کی وجہ سے اس کا اے کیو آئی تیزی سے گر جاتا ہے۔
مزید پرئیے:https://urdu.thepenpk.com/?p=4973
مریم اورنگزیب کا کہنا ہے کہ اسموگ کے مسائل کا حل بھارت کے ساتھ ڈائیلاگ میں ہے، اور اس سلسلے میں وزارت خارجہ کو آج خط لکھا جائے گا۔
انہوں نے مزید کہا کہ اسموگ ایس او پیز کی خلاف ورزی کرنے والوں کے خلاف مقدمات درج ہوں گے۔
پنجاب کے مختلف شہروں، جیسے نارووال، حافظ آباد، فیصل آباد اور راولپنڈی میں اینٹی اسموگ آپریشن جاری ہے۔
لاہور میں جمعہ اور اتوار کی رات ہیوی وہیکلز کے داخلے پر پابندی عائد کر دی گئی ہے۔
محکمۂ ٹرانسپورٹ کے ترجمان کے مطابق، اکتوبر میں 1,344 گاڑیاں تھانوں میں بند کی گئیں، 2,397 گاڑیوں کے خلاف چالان کیے گئے اور 1 کروڑ روپے کے جرمانے عائد کیے گئے۔
اس کے علاوہ، 9,000 گاڑیوں کی فٹنس کا معائنہ کیا گیا اور 5,000 گاڑیوں کو تکنیکی معیار پر پورا اترنے پر فٹنس سرٹیفکیٹ جاری کیے گئے۔
