وزیر مملکت خزانہ بلال اظہر کیانی نے کراچی کے تاجروں کو خوشخبری دیتے ہوئے کہا ہے کہ تاجروں اور دکانداروں کی سہولت کے لیے آسان ٹیکس اسکیم متعارف کرائی گئی ہے۔ اسکیم کے تحت دکاندار سالانہ فروخت شدہ مال پر ایک فیصد ٹیکس ادا کریں گے، جبکہ رجسٹرڈ دکانداروں کو ایف بی آر کی جانب سے سبز رنگ کی رجسٹریشن پلیٹ دی جائے گی۔ انہوں نے کہا کہ سبز پلیٹ والے دکانوں میں ایف بی آر عملہ معمول کی پوچھ گچھ کے لیے داخل نہیں ہو سکے گا اور اسکیم میں شامل دکانداروں کا عمومی آڈٹ بھی نہیں کیا جائے گا۔ اسکیم میں شامل دکاندار ود ہولڈنگ ایجنٹ بننے سے بھی مستثنیٰ ہوں گے۔
