نیوز ڈیسک
کراچی: کراچی کے نوجوان تاجر میر رضا علی کے قتل کیس کی تحقیقات ایک نئے مرحلے میں داخل ہوگئی ہیں، جہاں مشترکہ تحقیقاتی ٹیم (جے آئی ٹی) نے کاروباری شراکت داروں، مالی لین دین اور دیگر کاروباری معاملات کی تفصیلی چھان بین کا فیصلہ کیا ہے۔
تحقیقاتی ٹیم اب صرف واقعے کے حالات تک محدود رہنے کے بجائے مقتول کے کاروباری روابط، سوشل میڈیا سرگرمیوں اور ممکنہ مالی تنازعات کا بھی جائزہ لے گی۔
کیس کی تحقیقات کے لیے قائم جے آئی ٹی کا دوسرا اجلاس ڈی آئی جی ویسٹ آفس میں منعقد ہوا، جو چار گھنٹے سے زائد جاری رہا۔ اجلاس کی صدارت جے آئی ٹی کے سربراہ ڈی آئی جی ویسٹ عرفان بلوچ نے کی، جس میں مختلف انٹیلی جنس اور قانون نافذ کرنے والے اداروں کے افسران نے شرکت کی۔
تفتیشی ذرائع کے مطابق اجلاس میں میر رضا کے اہل خانہ سے مزید معلومات حاصل کی گئیں، جبکہ ایس آئی او فیروز آباد شبیر لغاری، سی آئی اے پولیس کے افسر غوث عالم، تفتیشی افسر ڈی ایس پی سراج لاشاری، ایس ایچ او فیروز آباد عدیل افضال اور سابق ایس ایچ او گلستان جوہر کامران قریشی کے بیانات بھی ریکارڈ کیے گئے۔
جے آئی ٹی نے میر رضا کے کاروباری پارٹنر احمد بھاردے اور ان کے بھائی سے بھی پوچھ گچھ کی۔ ذرائع کا کہنا ہے کہ احمد بھاردے سے ہونے والی ابتدائی تفتیش کا جائزہ لینے کے بعد تحقیقاتی ٹیم نے ان سے مزید سوالات کرنے اور تحقیقات کا دائرہ وسیع کرنے کا فیصلہ کیا ہے۔
اجلاس میں شہری پولیس رابطہ کمیٹی (سی پی ایل سی) کے نمائندوں نے بھی اپنی رپورٹ پیش کی۔ جے آئی ٹی نے اس کیس میں سی پی ایل سی کی معاونت جاری رکھنے کا فیصلہ کیا ہے تاکہ دستیاب معلومات اور شواہد کی بنیاد پر تحقیقات کو آگے بڑھایا جاسکے۔
تحقیقاتی ٹیم نے میر رضا کے سوشل میڈیا اکاؤنٹس، مالی لین دین اور کاروباری سرگرمیوں کا جائزہ بھی شروع کردیا ہے۔ ذرائع کے مطابق مقتول کے ساتھ کاروباری یا مالی معاملات رکھنے والے افراد کو مرحلہ وار طلب کیا جائے گا اور ان کے بیانات قلمبند کیے جائیں گے۔
جے آئی ٹی ماضی میں ہونے والی تحقیقات کا بھی ازسرنو جائزہ لے گی تاکہ ابتدائی تفتیش میں رہ جانے والے پہلوؤں اور ممکنہ خامیوں کی نشاندہی کی جاسکے۔
اسی سلسلے میں نیشنل سائبر کرائم انویسٹی گیشن ایجنسی (این سی سی آئی اے) کو کیس کے تکنیکی پہلوؤں کی دوبارہ جانچ کرکے رپورٹ مرتب کرنے کی ہدایت کی گئی ہے۔ ذرائع کا کہنا ہے کہ جے آئی ٹی کے آئندہ اجلاس میں سابقہ تفتیشی ٹیم کے متعدد ارکان کو بھی دوبارہ طلب کرکے ان کے بیانات ریکارڈ کیے جائیں گے۔
تحقیقات کے لیے جے آئی ٹی کو 10 روز کی مہلت
دوسری جانب کراچی کی جوڈیشل مجسٹریٹ شرقی کی عدالت نے میر رضا قتل کیس کی تحقیقات مکمل کرنے اور حتمی چالان پیش کرنے کے لیے جے آئی ٹی کو مزید 10 روز کی مہلت دے دی ہے۔
سماعت کے دوران جے آئی ٹی کے تفتیشی افسر ڈی ایس پی فرید خان نے عدالت سے مزید 14 روز کی مہلت طلب کی تھی۔ انہوں نے بتایا کہ جے آئی ٹی کا پہلا اجلاس 7 نومبر کو منعقد ہوا تھا، جس کے منٹس عدالت میں جمع کرادیے گئے ہیں، جبکہ دوسرا اجلاس بھی اسی روز منعقد ہونا تھا۔
عدالت نے استدعا منظور کرتے ہوئے 10 روز میں تحقیقات مکمل کرنے کی ہدایت کی اور جے آئی ٹی کو پابند کیا کہ وہ اپنے اجلاسوں کی کارروائی اور منٹس سے عدالت کو مسلسل آگاہ کرے۔
الیکٹرانک ڈیوائسز کی فارنزک جانچ کی اجازت
عدالت نے میر رضا اور احمد بھاردے کی الیکٹرانک ڈیوائسز کی لائیو فارنزک جانچ کی بھی اجازت دے دی ہے۔ متعلقہ حکام کو ہدایت کی گئی ہے کہ فارنزک کارروائی طے شدہ پروٹوکول کے مطابق مکمل کی جائے اور اس کے نتائج عدالت کے سامنے پیش کیے جائیں۔
ادھر جے آئی ٹی نے گزشتہ روز نارتھ ناظم آباد میں واقع برانچ سے میر رضا کے کاروباری پارٹنر کا ذاتی پستول بھی برآمد کیا تھا۔ اس کارروائی کے دوران برانچ کا ریکارڈ ضبط کرکے اسے سیل کردیا گیا، جبکہ برآمد ہونے والا اسلحہ فارنزک تجزیے کے لیے بھیج دیا گیا۔
تاہم احمد بھاردے کے اہل خانہ کا مؤقف ہے کہ متعلقہ برانچ 29 جولائی سے بند ہے اور ضبط کیا گیا اسلحہ نجی سیکیورٹی گارڈ کا ہے۔ ان کا کہنا ہے کہ وہ تحقیقات میں مکمل تعاون کررہے ہیں۔
میر رضا کی پراسرار گمشدگی سے قتل کی تحقیقات تک
25 سالہ تاجر میر رضا علی 28 جولائی کو کراچی کے علاقے پی ای سی ایچ ایس میں واقع اپنی رہائش گاہ سے لاپتا ہوئے تھے۔ اگلے روز ان کی لاش گلستان جوہر کے ایک ویران مقام سے ملی۔ پولیس نے ابتدائی طور پر واقعے کو ممکنہ خودکشی قرار دیا، تاہم اہل خانہ نے اس مؤقف کو مسترد کرتے ہوئے قتل کا شبہ ظاہر کیا اور شفاف تحقیقات کا مطالبہ کیا۔
ابتدائی پوسٹ مارٹم اور پولیس تفتیش پر سوالات اٹھنے کے بعد عدالت نے 6 اگست کو قبرکشائی اور دوبارہ پوسٹ مارٹم کی اجازت دی۔ میڈیکل بورڈ کی تشکیل سے متعلق تنازع کے باعث کارروائی میں تاخیر ہوئی، تاہم 8 اگست کو قبرکشائی کے بعد دوبارہ پوسٹ مارٹم کیا گیا۔
دوسری پوسٹ مارٹم رپورٹ میں گولی کے زخم اور جسم سے گزرنے کے راستے سے متعلق تفصیلات سامنے آئیں، جنہیں خودکشی کے ابتدائی مؤقف سے متضاد قرار دیا گیا۔ بعد ازاں مقدمے میں قتل کی دفعہ بھی شامل کردی گئی۔
کیس کی حساسیت اور ابتدائی تحقیقات پر اٹھنے والے سوالات کے پیش نظر سندھ حکومت نے 24 اگست کو سندھ ہائی کورٹ کے جسٹس عمر سیال کی سربراہی میں عدالتی کمیشن قائم کیا۔ کمیشن نے واقعے کے حالات، پولیس کی ابتدائی تفتیش، طبی شواہد اور شواہد جمع کرنے کے طریقہ کار کا جائزہ لیا۔
2 ستمبر کو سندھ ہائی کورٹ نے اہل خانہ کی جانب سے آزاد اور کثیر ادارہ جاتی جے آئی ٹی تشکیل دینے کی درخواست مسترد کرتے ہوئے قرار دیا کہ جے آئی ٹی کا قیام حکومت کا اختیار ہے۔
بعد ازاں 20 اکتوبر کو عدالتی کمیشن نے 62 صفحات پر مشتمل رپورٹ جاری کی، جس میں پولیس کی تفتیش کو سنگین ناکامی قرار دیتے ہوئے میر رضا کی موت کو قتل قرار دیا گیا۔
رپورٹ میں ابتدائی تحقیقات میں سنگین خامیوں کی نشاندہی کے ساتھ مزید تحقیقات، ممکنہ غفلت اور شواہد میں ردوبدل کے پہلوؤں کا جائزہ لینے کے لیے جے آئی ٹی تشکیل دینے کی سفارش کی گئی۔
ان سفارشات کی روشنی میں سندھ حکومت نے 24 اکتوبر کو ڈی آئی جی عرفان بلوچ کی سربراہی میں مشترکہ تحقیقاتی ٹیم تشکیل دی، جس میں رینجرز، وفاقی انٹیلی جنس اداروں اور این سی سی آئی اے کے نمائندے بھی شامل کیے گئے۔
ٹیم کو واقعے سے متعلق شواہد کا ازسرنو جائزہ لینے اور ابتدائی تفتیش میں سامنے آنے والے سوالات کے جوابات تلاش کرنے کی ذمہ داری سونپی گئی۔
سندھ حکومت نے بعد ازاں جے آئی ٹی کی تشکیل کا باضابطہ نوٹیفکیشن بھی جاری کردیا۔
کئی اہم سوالات تاحال جواب طلب
میر رضا قتل کیس میں عدالتی کمیشن کی رپورٹ، دوبارہ پوسٹ مارٹم، الیکٹرانک ڈیوائسز کی فارنزک جانچ اور کاروباری معاملات کی چھان بین کے باوجود کئی اہم سوالات تاحال حل طلب ہیں۔
مقتول کی موت کے اصل محرکات کیا تھے؟ کاروباری معاملات یا مالی لین دین کا اس واقعے سے کوئی تعلق تھا؟ ابتدائی تحقیقات میں کون سی اہم کڑیاں نظرانداز ہوئیں اور کیا شواہد کے تحفظ میں غفلت برتی گئی؟
ان سوالات کے جوابات اب جے آئی ٹی کی تحقیقات سے جڑے ہیں۔ تاہم قتل میں ملوث افراد، ممکنہ سہولت کاروں اور واقعے کے محرکات کا حتمی تعین ابھی باقی ہے، جس کے لیے شواہد کی جانچ اور قانونی کارروائی فیصلہ کن اہمیت رکھتی ہے۔
