نیوز ڈیسک
لاہور: لاہور ہائیکورٹ نے بچے کی ولدیت، ڈی این اے ٹیسٹ اور بنیادی حقوق سے متعلق اہم فیصلہ سناتے ہوئے قرار دیا ہے کہ شادی کے دوران پیدا ہونے والے بچے کی قانونی ولدیت محض نجی ڈی این اے رپورٹ کی بنیاد پر ختم نہیں کی جا سکتی، جبکہ عدالت کی اجازت اور والدہ کی رضامندی کے بغیر بچے کا خفیہ ڈی این اے ٹیسٹ کرانا اس کے بنیادی حقوق کے منافی ہے۔
جسٹس اسد علی باجوہ نے اسامہ طاہر اور دیگر کی درخواست مسترد کرتے ہوئے واضح کیا کہ یکطرفہ طور پر نجی لیبارٹری سے حاصل کی گئی ڈی این اے رپورٹ بچے کی ولدیت کے تعین کے لیے حتمی قانونی ثبوت نہیں بن سکتی۔ عدالت نے برطانیہ کی ایک نجی لیبارٹری کی ڈی این اے رپورٹ کو بھی ولدیت سے انکار کے لیے قابل قبول بنیاد تسلیم نہیں کیا۔
درخواست گزار نے مؤقف اختیار کیا تھا کہ نجی ڈی این اے ٹیسٹ کے مطابق بچہ اس کی اولاد نہیں، اس لیے اسے بچے کے نان و نفقہ کی ادائیگی کا پابند نہیں بنایا جا سکتا۔ تاہم لاہور ہائیکورٹ نے فیملی کورٹ اور ایڈیشنل سیشن جج گوجرانوالہ کے فیصلوں کے خلاف دائر درخواست مسترد کرتے ہوئے بچے کے قانونی اور مالی حقوق کو برقرار رکھا۔
عدالت نے اپنے فیصلے میں اس بات پر زور دیا کہ ڈی این اے ٹیسٹ محض سائنسی سہولت یا کسی فریق کی خواہش پر نہیں کرایا جا سکتا۔ ایسے معاملے میں بچے کی عزتِ نفس، رازداری اور ذہنی و جذباتی تحفظ کو بنیادی اہمیت حاصل ہے۔ کسی بھی ڈی این اے ٹیسٹ کی اجازت دینے سے پہلے بچے کے بہترین مفاد اور بنیادی حقوق کا جائزہ لینا ضروری ہے۔
فیصلے میں آئین کے آرٹیکل 14 کا حوالہ دیتے ہوئے کہا گیا کہ یہ شق انسانی عزت و وقار اور نجی زندگی کے تحفظ کی ضمانت دیتی ہے۔ عدالت کے مطابق درست نکاح کے دوران چھ قمری ماہ سے زائد مدت میں پیدا ہونے والا بچہ شوہر کی قانونی اولاد تصور ہوگا، جبکہ ولدیت کو چیلنج کرنے کے لیے والد کو بچے کی پیدائش کے بعد 40 روز کے اندر قانونی اقدام کرنا ہوگا۔
لاہور ہائیکورٹ نے نابالغ بچے کا ماہانہ نان و نفقہ 25 ہزار روپے مقرر کرنے کا فیصلہ بھی برقرار رکھا۔ عدالت کے مطابق بچے کے نان و نفقہ میں صرف خوراک اور لباس ہی نہیں بلکہ رہائش، تعلیم، علاج معالجے اور جسمانی، ذہنی و جذباتی نشوونما کے اخراجات بھی شامل ہیں۔
اسی طرح عدالت نے بیوی کے جہیز کے سامان کی عدم فراہمی پر اس کی متبادل قیمت 9 لاکھ 70 ہزار روپے مقرر کرنے کا فیصلہ بھی برقرار رکھا۔
یہ فیصلہ خاندانی تنازعات میں بچوں کے قانونی حقوق، رازداری اور فلاح و بہبود کی اہمیت کو اجاگر کرتا ہے، جبکہ واضح کرتا ہے کہ والدین کے درمیان اختلافات کی بنیاد پر بچے کے حقوق کو یکطرفہ طور پر متاثر نہیں کیا جا سکتا۔
