یمن میں حوثیوں کی بڑی پیش قدمی، عدن پر قبضے کا خطرہ بڑھ گیا؟

0

نیوز ڈیسک

ریاض: یمن میں حوثی جنگجوؤں نے جنوبی ساحلی علاقوں میں اہم پیش قدمی کرتے ہوئے مزید علاقوں پر قبضہ کر لیا ہے، جس کے نتیجے میں سعودی عرب کی حمایت یافتہ سرکاری افواج کو پیچھے ہٹنا پڑا ہے۔ حوثیوں کی اس پیش قدمی نے تزویراتی اہمیت کے حامل بندرگاہی شہر عدن کے دفاع اور خطے کی سیکیورٹی سے متعلق خدشات بڑھا دیے ہیں۔

عسکری ذرائع کے مطابق حوثی جنگجو عدن سے تقریباً 100 کلومیٹر مغرب میں واقع علاقے خور عمیرہ تک پہنچ چکے ہیں اور قوہ کے مقام پر سرکاری افواج کی چوکیوں سے محض 25 کلومیٹر کے فاصلے پر ہیں۔

یمنی حکومت نے اتوار کو اعلان کیا تھا کہ وہ عالمی بحری تجارت کے لیے انتہائی اہم گزرگاہ باب المندب کے قریب واقع علاقوں سے اپنی فوجیں واپس بلا رہی ہے تاکہ دفاعی حکمت عملی کو ازسرنو ترتیب دیتے ہوئے تمام تر توجہ عدن کے تحفظ پر مرکوز کی جا سکے۔

عدن 2014 میں حوثی جنگجوؤں کے دارالحکومت صنعا پر قبضے کے بعد سے یمنی حکومت کا مرکزی سیاسی و انتظامی مرکز رہا ہے۔

یہ پیش رفت سرکاری افواج کی جانب سے اکتوبر میں شروع کیے گئے جوابی فوجی آپریشن کی ناکامی کے بعد سامنے آئی ہے، جس کا مقصد حوثیوں کی پیش قدمی روکنا اور کھوئے ہوئے علاقوں کا کنٹرول دوبارہ حاصل کرنا تھا۔

دریں اثنا، میدان جنگ میں حالیہ ناکامیوں کے تناظر میں سعودی عرب نے اپنی عسکری قیادت میں بھی تبدیلیاں کی ہیں۔ اس سلسلے میں لیفٹیننٹ جنرل فہد بن حمد بن عبدالعزیز السلمان کو ان کے عہدے سے تبدیل کر دیا گیا ہے، جو اگست 2024 سے اتحادی فوجی کارروائیوں کی نگرانی کر رہے تھے۔

تجزیہ کاروں کے مطابق جنوبی یمن میں حوثیوں کی پیش قدمی نہ صرف سعودی حمایت یافتہ حکومت کے لیے ایک بڑا چیلنج ہے بلکہ اس کے علاقائی سلامتی اور عالمی بحری تجارت پر بھی دور رس اثرات مرتب ہو سکتے ہیں۔

باب المندب عالمی تجارت کے اہم ترین سمندری راستوں میں شمار ہوتا ہے، جہاں سے بحیرہ احمر اور نہر سویز کے ذریعے بین الاقوامی تجارتی جہاز گزرتے ہیں۔ اس علاقے میں کشیدگی بڑھنے سے عالمی جہاز رانی، تجارتی سرگرمیوں اور سپلائی چین کو مزید خطرات لاحق ہو سکتے ہیں۔

صورتحال کے پیش نظر عالمی مبصرین کی نظریں سعودی عرب اور اس کے اتحادیوں کے ممکنہ سفارتی یا عسکری ردعمل پر مرکوز ہیں، جبکہ یمن میں جاری تنازع کے مزید شدت اختیار کرنے کے خدشات بھی بڑھ رہے ہیں۔

Leave A Reply

Your email address will not be published.