لاہور:پنجاب کے میدانی علاقوں میں اسموگ اور دھند کا سلسلہ جاری ہے، جس کے باعث متعدد مقامات پر موٹر ویز کو بند کر دیا گیا ہے۔
موٹر وے پولیس نے شہریوں کو غیر ضروری سفر سے گریز کرنے کی ہدایت کی ہے۔
موٹر وے پولیس کے مطابق، دھند اور اسموگ کے باعث لاہور سیالکوٹ موٹر وے کو سمبڑیال تک بند کر دیا گیا ہے، جبکہ لاہور اسلام آباد موٹر وے (ایم 2) کوٹ مومن تک ہر قسم کی ٹریفک کے لیے بند ہے۔
اسی طرح، موٹر وے ایم 5 شیر شاہ ملتان سے ظاہر پیر تک اور موٹر وے ایم 4 فیصل آباد سے ملتان تک بھی بند ہیں۔
تفصیلات کے مطابق، گوجرہ میں اسموگ کی وجہ سے ٹریکٹر ٹرالی کی موٹر سائیکل سے ٹکر میں ایک ماں اور دو بچوں سمیت تین افراد جاں بحق ہو گئے ہیں۔
موٹر وے پولیس نے شہریوں کو ہدایت کی ہے کہ گاڑیوں پر فوگ لائٹس کا استعمال کریں اور اگلی گاڑی سے مناسب فاصلہ رکھیں۔
پاکستان میں اسموگ اور آلودگی کی سطح انتہائی بلند ہے، اور بھارت سے آنے والی آلودہ ہواؤں نے ملک کے مختلف حصوں کو شدید متاثر کیا ہے۔
ملتان مسلسل تیسرے روز ملک کا سب سے آلودہ شہر رہا ہے، جبکہ لاہور اور پشاور بالترتیب دوسرے اور تیسرے نمبر پر ہیں۔
رات کے اوقات میں، لاہور سے کوٹ مومن تک موٹر وے ایم 2، لاہور سیالکوٹ موٹر وے اور ایم 4 اور ایم 5 کے مختلف حصے بند ہیں۔
مزید پرئیے:https://urdu.thepenpk.com/?p=5040
سینئر وزیر پنجاب، مریم اورنگزیب نے اس اسموگ کو نہ صرف پورے پاکستان بلکہ خطے کا ایک اہم انسانی مسئلہ قرار دیتے ہوئے شہریوں سے احتیاط برتنے کی اپیل کی ہے۔
اس کے ساتھ ہی، متحدہ عرب امارات نے پاکستان کو اسموگ کے اثرات کم کرنے کے لیے تکنیکی مدد فراہم کرنے کی پیشکش کی ہے۔
اس سے قبل متحدہ عرب امارات نے خصوصی طیارے بھیجے تھے جنہوں نے کلاؤڈ سیڈنگ کی تکنیک کا استعمال کرتے ہوئے پنجاب کے بعض علاقوں میں مصنوعی بارش کرائی تھی۔
اس اقدام سے نہ صرف موسم میں بہتری آئی تھی بلکہ برادر ملک کے شہریوں کو بھی خاطر خواہ سکون حاصل ہوا تھا۔
اس طرح کے اقدامات عالمی سطح پر موسمی حالات سے نمٹنے کے لئے جدید طریقوں کو اپنانے کی اہمیت کو اجاگر کرتے ہیں، اور ان سے علاقے کے لوگوں کی فلاح و بہبود میں بھی مدد ملتی ہے۔
سفیر حماد عبید ابراہیم سالم الذہبی نے ہمیشہ اپنے میزبان ملک کے عوام کی فلاح و بہبود کے منصوبوں میں فعال کردار ادا کیا ہے۔
انہوں نے پاکستانی انتظامیہ کے اقدامات پر اطمینان کا اظہار کیا ہے، جو اسموگ کی صورتحال کی روک تھام کے لیے مؤثر تدابیر اختیار کر رہی ہے۔
متحدہ عرب امارات کے عہدیدار کا کہنا ہے کہ وہ پاکستانی حکومت کے ساتھ رابطے میں ہیں اور امید ظاہر کی کہ اسموگ کی صورتحال پر قابو پانے کے لیے مزید اقدامات کیے جائیں گے۔
