نیوز ڈیسک
ناگویا: جاپان میں ہونے والے 2026 کے ایشیائی کھیلوں کے لیے ناگویا کی بندرگاہ پر کھلاڑیوں اور عہدیداروں کی رہائش کا منفرد انتظام کیا گیا ہے، جہاں ایک کروز شپ کو عارضی طور پر ’تیرتی ہوئی بستی‘ میں تبدیل کر دیا گیا ہے۔
رہائش کے لیے استعمال ہونے والا 290 میٹر طویل اطالوی کروز شپ ’کوسٹا سیرینا‘ (Costa Serena) سمندری راستے سے ناگویا پہنچ چکا ہے، جہاں اسے کھلاڑیوں کے قیام کے لیے درکار سہولیات فراہم کی گئی ہیں۔
منتظمین کے مطابق تقریباً 4 ہزار کھلاڑی اور عہدیدار اس کروز شپ میں قیام کریں گے، جبکہ ایشیائی کھیلوں کے آغاز سے قبل ہی شرکا کی آمد کا سلسلہ شروع ہو گیا ہے۔
اخراجات میں کمی کے لیے منتظمین نے روایتی ایتھلیٹس ولیج تعمیر نہ کرنے کا فیصلہ کیا ہے۔ اس کے بجائے آئیچی-ناگویا کے مختلف مقامات پر رہائش کے عارضی انتظامات کیے گئے ہیں، جن میں کروز شپ بھی شامل ہے۔
تاہم، کھلاڑیوں کے لیے کروز شپ کو رہائش گاہ کے طور پر استعمال کرنے کے فیصلے کو کھیلوں کے آغاز سے قبل تنقید کا سامنا بھی ہے۔ منتظمین کا کہنا ہے کہ یہ انتظام ایک مستقل ایتھلیٹس ولیج کی تعمیر کے متبادل کے طور پر کیا گیا ہے اور اس سے اخراجات میں کمی آئے گی۔
2026 کے ایشیائی کھیلوں کا باقاعدہ آغاز 19 ستمبر کو جاپان کے آئیچی-ناگویا خطے میں ہوگا۔
