نیوز ڈیسک
راولپنڈی: ڈائریکٹر جنرل انٹر سروسز پبلک ریلیشنز (ڈی جی آئی ایس پی آر) لیفٹیننٹ جنرل احمد شریف چوہدری نے کہا ہے کہ پاکستان اپنے دفاع کے ساتھ ساتھ کسی بھی خطرے کا مؤثر جواب دینے کی صلاحیت رکھتا ہے۔
عرب ٹیلی ویژن العربیہ کو دیے گئے انٹرویو میں لیفٹیننٹ جنرل احمد شریف چوہدری نے کہا کہ بھارت کی جانب سے اپنی فوجی صلاحیتوں میں اضافہ کرنے کا مطلب یہ نہیں کہ پاکستان کسی ہتھیاروں کی دوڑ میں شامل ہے۔
انہوں نے کہا کہ پاکستان کی دفاعی صلاحیتیں بنیادی طور پر دفاعی نوعیت کی ہیں اور ملک کا کسی ریاست کے خلاف جارحانہ عزائم نہیں۔ ان کے مطابق پاکستان اپنی قومی سلامتی کے تحفظ اور درپیش خطرات سے نمٹنے کی صلاحیت پر پراعتماد ہے۔
ڈی جی آئی ایس پی آر نے کہا کہ پاکستان کے سیاسی مقاصد کا تعین سیاسی قیادت کرتی ہے، جبکہ فوج اور ریاست کے قومی مقاصد الگ الگ نہیں ہیں۔ انہوں نے واضح کیا کہ ملکی ترجیحات اور سیاسی اہداف طے کرنا سیاسی قیادت کی ذمہ داری ہے۔
افغانستان سے متعلق گفتگو کرتے ہوئے لیفٹیننٹ جنرل احمد شریف چوہدری نے کہا کہ پاکستان افغان سرزمین سے اپنے خلاف کسی قسم کی مداخلت نہیں چاہتا۔
انہوں نے الزام عائد کیا کہ افغان طالبان حکام پاکستان کے اندر حملوں میں ملوث عسکریت پسندوں کو تربیت اور معاونت فراہم کر رہے ہیں۔
پاکستان اس سے قبل بھی افغان طالبان حکام پر تحریک طالبان پاکستان (ٹی ٹی پی) سمیت عسکریت پسند گروہوں کو افغان سرزمین استعمال کرنے کی اجازت دینے کے الزامات عائد کرتا رہا ہے، تاہم افغان طالبان حکام ان الزامات کی تردید کرتے ہیں۔
