نیوز ڈیسک
اسلام آباد: وفاقی تحقیقاتی ادارے (ایف آئی اے) نے آسٹریلیا کا ویزا دلانے کے نام پر شہری سے لاکھوں روپے وصول کرنے کے الزام میں ایک ملزم کو گرفتار کر لیا۔
ایف آئی اے کے مطابق اینٹی ہیومن ٹریفکنگ سرکل (AHTC) اسلام آباد نے انکوائری نمبر 644/2024 مکمل کرنے کے بعد ملزم کے خلاف کارروائی کی۔
تحقیقات کے دوران معلوم ہوا کہ ملزم نے شکایت کنندہ کو آسٹریلیا کا ویزا دلانے کا وعدہ کرکے 2 لاکھ 77 ہزار 635 روپے وصول کیے، تاہم نہ تو وعدے کے مطابق ویزا فراہم کیا گیا اور نہ ہی رقم واپس کی گئی۔
ایف آئی اے کا کہنا ہے کہ ملزم کی گرفتاری کے بعد شکایت کنندہ سے وصول کی گئی مکمل رقم بھی برآمد کر لی گئی ہے۔
ادارے کے مطابق مزید تفتیش کے دوران کیس میں کسی دوسرے شخص کے ملوث ہونے کی صورت میں اس کا بھی تعین کیا جائے گا۔
ایف آئی اے کے انسپکٹر محمد عبداللہ کیانی کیس کی تفتیش کر رہے ہیں۔
ایف آئی اے اسلام آباد زون نے کہا ہے کہ ویزا فراڈ اور انسانی اسمگلنگ میں ملوث عناصر کے خلاف کارروائیاں جاری رہیں گی اور ذمہ دار افراد کو قانون کے مطابق کارروائی کا سامنا کرنا ہوگا۔
