نیوز ڈیسک
لاہور: پاکستانی اداکارہ میرا نے لندن میں موجود پاکستانی سفارت خانے اور متعلقہ حکام سے اپیل کی ہے کہ انہیں انسانی ہمدردی کی بنیاد پر ہنگامی ویزا جاری کیا جائے تاکہ وہ لندن جا کر اپنی شدید علیل بہن سے ملاقات کر سکیں۔
ایک ویڈیو بیان میں میرا نے بتایا کہ وہ اس وقت نیویارک میں موجود ہیں اور اپنی بہن شائستہ عباس سے ملنے کے لیے لندن جانا چاہتی ہیں۔ ان کے مطابق ان کی بہن کینسر کے آخری مرحلے میں ہیں۔
اداکارہ نے بتایا کہ ان کی والدہ شفقت بیگم اور بھائی سید حسین عباس پہلے ہی لندن میں شائستہ عباس کے پاس موجود ہیں۔
میرا نے متعلقہ حکام سے اپیل کرتے ہوئے کہا کہ وہ اپنی بہن سے ملاقات کرنا چاہتی ہیں اور موجودہ صورتحال کے پیش نظر انہیں انسانی ہمدردی کی بنیاد پر لندن سفر کی اجازت دی جائے۔
انہوں نے لندن میں پاکستانی سفارت خانے اور دیگر متعلقہ حکام سے درخواست کی کہ ان کی ویزا درخواست پر ہمدردانہ بنیادوں پر غور کیا جائے تاکہ وہ اس مشکل وقت میں اپنی بیمار بہن اور اہل خانہ کے ساتھ موجود رہ سکیں۔
اداکارہ کی اپیل ایسے وقت میں سامنے آئی ہے جب ان کے اہل خانہ لندن میں ان کی بیمار بہن کے ساتھ موجود ہیں، جبکہ میرا خود نیویارک میں ہیں۔
