نیوز ڈیسک
کوٹلی: آزاد کشمیر کے ضلع کوٹلی میں مسلح افراد کی فائرنگ سے پاکستان رینجرز اور آزاد کشمیر پولیس کے 5 اہلکار زخمی ہوگئے۔
آزاد کشمیر پولیس کے ترجمان کے مطابق پنجی بازار میں مسلح عناصر نے قانون نافذ کرنے والے اداروں کے اہلکاروں کو فائرنگ کا نشانہ بنایا، جس کے نتیجے میں پاکستان رینجرز کے 3 اور آزاد کشمیر پولیس کے 2 اہلکار زخمی ہوئے۔
ترجمان کا کہنا ہے کہ قانون نافذ کرنے والے اداروں کی جوابی کارروائی کے دوران بھی فائرنگ کی گئی۔ زخمی اہلکاروں کو فوری طبی امداد کے لیے مقامی اسپتال منتقل کر دیا گیا ہے۔
پولیس ترجمان نے واضح کیا ہے کہ قانون نافذ کرنے والے اداروں پر حملے میں ملوث عناصر کے خلاف سخت کارروائی کی جائے گی۔ ان کا کہنا تھا کہ قانون کی عملداری، امن و امان کے قیام اور شہریوں کے جان و مال کا تحفظ ہر صورت یقینی بنایا جائے گا۔
