نیوز ڈیسک
اسلام اباد: حکومت اور جماعت اسلامی کی مذاکراتی کمیٹیوں کے درمیان پیٹرولیم لیوی کے خاتمے اور پیٹرولیم مصنوعات کی قیمتوں میں کمی کے معاملے پر مذاکرات مکمل ہوگئے۔ جماعت اسلامی کے رہنما لیاقت بلوچ نے کہا ہے کہ مذاکرات میں عوام کو ریلیف فراہم کرنے پر اتفاق کیا گیا ہے۔
مذاکرات کے بعد میڈیا سے گفتگو کرتے ہوئے لیاقت بلوچ نے بتایا کہ حکومت کے ساتھ مذاکرات کے 10 دور مکمل ہو چکے ہیں، جبکہ آج ہونے والی اہم نشست میں عوام کو ریلیف دینے کے لیے اقدامات پر اتفاق کیا گیا۔
انہوں نے کہا کہ حکومت کا مؤقف ہے کہ دنیا اس وقت جنگی حالات سے گزر رہی ہے، تاہم مذاکرات میں طے پایا ہے کہ عوام کو دیے جانے والے ریلیف کے دائرہ کار اور مدت میں اضافہ کیا جائے گا۔
لیاقت بلوچ کے مطابق جماعت اسلامی نے 1000 سی سی گاڑیوں، ٹریکٹرز اور پبلک ٹرانسپورٹ کو بھی ریلیف پیکیج میں شامل کرنے کی تجویز دی ہے، جس پر حکومت کافی حد تک آمادہ دکھائی دیتی ہے۔
انہوں نے مزید کہا کہ حکومت کو اس بات کا ادراک ہے کہ پیٹرولیم لیوی کے خاتمے سے عوام کو ریلیف مل سکتا ہے۔ حکومت اس حوالے سے اپنا منصوبہ پیش کرے گی اور اس پر کام شروع کر دیا گیا ہے۔
لیاقت بلوچ کا کہنا تھا کہ حکومت بجٹ تک عوام کو ریلیف فراہم کرنے کے لیے ایک پروگرام بھی دے گی۔
