نیوز ڈیسک
اسلام آباد: امریکی صدر ڈونلڈ ٹرمپ نے اسلام آباد میں امریکا کی قائم مقام ناظم الامور نیتالی بیکر کو پاکستان میں نیا امریکی سفیر نامزد کر دیا ہے۔ ان کی نامزدگی منظوری کے لیے امریکی سینیٹ کو ارسال کر دی گئی ہے۔
وائٹ ہاؤس کی جانب سے جاری کردہ بیان کے مطابق نیتالی بیکر کی بطور سفیر نامزدگی اب سینیٹ کے جائزے اور توثیق کے مراحل سے گزرے گی۔ ابتدائی طور پر سینیٹ کی خارجہ تعلقات کمیٹی ان کی نامزدگی کا جائزہ لے گی، جس کے بعد منظوری کی صورت میں معاملہ سینیٹ کے مکمل ایوان میں ووٹنگ کے لیے پیش کیا جائے گا۔
سینیٹ سے توثیق ملنے کے بعد نیتالی بیکر باضابطہ طور پر پاکستان میں امریکی سفیر کی ذمہ داریاں سنبھال سکیں گی۔
امریکی سفارت خانے کی ویب سائٹ کے مطابق نیتالی بیکر اگست 2024 میں اسلام آباد میں ڈپٹی چیف آف مشن کے طور پر تعینات ہوئی تھیں۔ بعد ازاں جنوری 2025 میں انہوں نے اس وقت کے امریکی سفیر ڈونلڈ آرمین بلوم کی روانگی کے بعد قائم مقام ناظم الامور کی ذمہ داریاں سنبھال لی تھیں۔
پاکستان میں تعیناتی سے قبل نیتالی بیکر اگست 2021 سے جولائی 2024 تک قطر کے دارالحکومت دوحہ میں امریکی سفارت خانے کی ڈپٹی چیف آف مشن کے طور پر خدمات انجام دے چکی ہیں۔
ان کے سفارتی کیریئر میں لیبیا میں امریکی مشن کی ڈپٹی چیف آف مشن اور قائم مقام ناظم الامور کے عہدے بھی شامل ہیں۔ اس کے علاوہ وہ دبئی میں امریکی قونصل خانے کے ایران ریجنل پریزنس آفس کی ڈپٹی ڈائریکٹر اور کویت میں امریکی سفارت خانے میں اقتصادی امور کی مشیر بھی رہ چکی ہیں۔
نیتالی بیکر امریکی محکمہ خارجہ کے بیورو آف نیئر ایسٹرن افیئرز میں دفتر برائے شمالی افریقہ کی ڈائریکٹر کے طور پر بھی کام کر چکی ہیں۔
امریکی سفارت خانے کی ویب سائٹ کے مطابق انہوں نے 2009 سے 2011 تک لیبیا میں سیاسی اور اقتصادی امور کی مشیر کی حیثیت سے خدمات انجام دیں۔ یہ وہ دور تھا جب تقریباً تین دہائیوں کے تعطل کے بعد امریکا اور لیبیا کے درمیان دوطرفہ تعلقات معمول پر لانے کی کوششیں جاری تھیں۔
فروری 2011 میں لیبیا میں انقلاب کے دوران بھی نیتالی بیکر وہاں موجود تھیں، جب سیکیورٹی صورت حال کے باعث امریکی حکومت کو سفارت خانے کا عملہ واپس بلانا اور سفارتی مشن خالی کرنا پڑا تھا۔
ان کی نامزدگی کی امریکی سینیٹ سے توثیق کے بعد پاکستان میں امریکی سفیر کی حیثیت سے باقاعدہ تقرری کا عمل مکمل ہو جائے گا۔
