عمران خان کے بلڈ پریشر اور برین ہیمرج کا خطرہ، اسلام آباد ہائیکورٹ میں اہم انکشاف

نیوز ڈیسک

اسلام آباد: اسلام آباد ہائیکورٹ نے 190 ملین پاؤنڈ کیس میں عمران خان اور بشریٰ بی بی کی اپیلوں کی سماعت کے دوران دونوں ملزمان کے وکلا کو ان سے جیل میں ملاقات کرانے کا حکم دے دیا ہے۔ عدالت نے ہدایت کی ہے کہ سردار لطیف کھوسہ کی اپنے مؤکلین سے کم از کم ایک گھنٹے کی ملاقات جلد یقینی بنائی جائے تاکہ اپیلوں پر حتمی دلائل کا آغاز کیا جا سکے۔

منگل کو چیف جسٹس سردار محمد سرفراز ڈوگر اور جسٹس محمد آصف پر مشتمل دو رکنی بینچ نے اپیلوں کی سماعت کی، جس میں ملزمان کی صحت، وکلا تک رسائی اور مقدمے کی تیاری کے لیے درکار وقت پر تفصیلی بحث ہوئی۔

سماعت کے دوران بانی پاکستان تحریک انصاف (پی ٹی آئی) عمران خان کے وکیل بیرسٹر سلمان صفدر نے ان کی طبیعت سے متعلق تشویش کا اظہار کرتے ہوئے بتایا کہ ان کے مؤکل کی آنکھوں کی حالت میں کچھ بہتری آئی ہے، تاہم بلڈ پریشر تاحال قابو میں نہیں اور انہیں برین ہیمرج کے ممکنہ خطرے سے بھی آگاہ کیا گیا ہے۔

انہوں نے بشریٰ بی بی کی صحت پر بھی تحفظات ظاہر کرتے ہوئے کہا کہ ان کی آنکھ کی حالت انتہائی خراب ہے اور انجری کے آثار بھی موجود ہیں۔ ان کے مطابق بشریٰ بی بی کو چھ ماہ قبل سرجری کے لیے لے جایا گیا تھا جبکہ 15 نومبر کو دوبارہ آپریشن متوقع ہے۔

وکیل نے مؤقف اختیار کیا کہ جیل میں ان کا مناسب علاج ممکن نہیں، اس لیے انہیں علاج کی غرض سے ضمانت دی جائے اور طبی معائنے کے لیے میڈیکل بورڈ تشکیل دیا جائے۔

تاہم ایڈووکیٹ جنرل اسلام آباد نے حکومتی رپورٹ پیش کرتے ہوئے ان تحفظات کی تردید کی اور کہا کہ بشریٰ بی بی کو جیل میں تمام ممکنہ طبی سہولیات فراہم کی جا رہی ہیں۔ انہوں نے بتایا کہ 8 نومبر کو بھی میڈیکل بورڈ نے ان کا معائنہ کیا تھا اور سپریم کورٹ کے احکامات پر عمل درآمد کیا جا رہا ہے۔

دورانِ سماعت وکلا کی اپنے مؤکلین تک رسائی کا معاملہ بھی زیر بحث آیا۔ لطیف کھوسہ نے شکایت کی کہ عدالتی حکم کے باوجود ان کی عمران خان اور بشریٰ بی بی سے ملاقات نہیں کرائی گئی۔ اس پر چیف جسٹس نے وضاحت کی کہ پہلے ملاقات کا حکم بیرسٹر سلمان صفدر کے لیے دیا گیا تھا۔

عدالت نے ایڈووکیٹ جنرل سے استفسار کیا کہ کیا لطیف کھوسہ کی دونوں ملزمان سے آئندہ ایک دو روز میں ملاقات ممکن بنائی جا سکتی ہے؟ چیف جسٹس نے ریمارکس دیے کہ اگر ملاقات میں کوئی رکاوٹ ہے تو اسے دور کیا جانا چاہیے۔

بیرسٹر سلمان صفدر نے عدالت کو مزید بتایا کہ ان کی عمران خان سے سات ماہ جبکہ بشریٰ بی بی سے 11 ماہ بعد ملاقات ہوئی ہے اور اب انہیں اپیلوں پر دلائل دینے کی باقاعدہ ہدایت مل چکی ہے۔ انہوں نے کیس کی پیپر بکس کے مطالعے اور تیاری کے لیے مزید وقت مانگا۔

نیب پراسیکیوٹر نے اس درخواست کی مخالفت کرتے ہوئے مؤقف اختیار کیا کہ ملزمان کی جانب سے طویل عرصے سے نیب کو بدنام کیا جا رہا ہے اور اب مزید مہلت طلب کی جا رہی ہے۔

چیف جسٹس نے ریمارکس دیے کہ اپیلوں کو دائر ہوئے ایک سال سے زائد کا عرصہ گزر چکا ہے، تاہم ملزمان کو تیاری کے لیے مناسب وقت فراہم کیا جائے گا۔ عدالت نے واضح کیا کہ اب اپیلوں پر حتمی دلائل کا آغاز ناگزیر ہو چکا ہے۔

سماعت کے اختتام پر عدالت نے لطیف کھوسہ کو عمران خان اور بشریٰ بی بی سے کم از کم ایک گھنٹے کی ملاقات کرانے کا حکم دیا اور ایڈووکیٹ جنرل کو اس کا فوری انتظام کرنے کی ہدایت کی، تاکہ آئندہ ہفتے سے اپیلوں پر باقاعدہ حتمی دلائل شروع کیے جا سکیں۔