نیوز ڈیسک
اسلام آباد: وزیراعظم شہباز شریف اور مسلم لیگ (ن) کے قائد نواز شریف کے درمیان ہونے والی اہم ملاقات میں ملک کی موجودہ سیاسی صورت حال، حکومت اور اتحادی جماعتوں کے درمیان اختلافات اور سیاسی کشیدگی کم کرنے کے لیے مختلف تجاویز پر غور کیا گیا ہے۔
ذرائع کے مطابق ملاقات میں اس بات پر اتفاق کیا گیا کہ سیاسی محاذ آرائی اور ٹکراؤ کی سیاست سے گریز کرتے ہوئے حکومت کی کارکردگی، ملکی ترقی اور عوامی مسائل کے حل پر توجہ مرکوز کی جائے۔
سیاسی ماحول میں بہتری اور کشیدگی کم کرنے کے لیے نائب وزیراعظم و وزیر خارجہ اسحاق ڈار کو خصوصی ذمہ داری سونپنے کا فیصلہ بھی کیا گیا۔
ذرائع کا کہنا ہے کہ ملاقات میں حکومت کی اتحادی جماعتوں، خصوصاً مسلم لیگ (ق) کے ساتھ معاملات بہتر بنانے اور دیگر اتحادیوں کے تحفظات دور کرنے پر بھی تبادلہ خیال کیا گیا۔ اس حوالے سے اتفاق کیا گیا کہ اختلافی امور کو محاذ آرائی کے بجائے مذاکرات اور باہمی افہام و تفہیم کے ذریعے حل کیا جائے گا۔
اجلاس میں وزیراعلیٰ پنجاب مریم نواز نے بھی شرکت کی، جہاں انہوں نے صوبے کے انتظامی معاملات اور ملک کی موجودہ سیاسی صورت حال پر اپنا نقطہ نظر پیش کیا۔
دوسری جانب ملاقات میں آئندہ بلدیاتی انتخابات کے لیے مسلم لیگ (ن) کی حکمت عملی بھی زیر بحث آئی۔ ذرائع کے مطابق فیصلہ کیا گیا کہ پارٹی کے ساتھ مخلص، متحرک اور نوجوان قیادت کو آگے لانے کے لیے اقدامات کیے جائیں گے تاکہ مقامی سطح پر جماعتی تنظیم کو مزید مضبوط بنایا جاسکے۔
ملاقات میں ہونے والی مشاورت کو حکومتی سطح پر سیاسی تناؤ کم کرنے، اتحادیوں کو ساتھ لے کر چلنے اور آئندہ انتخابی حکمت عملی مرتب کرنے کی کوششوں کا حصہ قرار دیا جا رہا ہے۔
