نیوز ڈیسک
فیصل آباد: فیصل آباد میں خاتون سیلز گرل پر تشدد کے واقعے میں پولیس نے ملزم کو گرفتار کرلیا، جس کے بعد تھانے میں متاثرہ خاتون نے ہتھکڑیوں میں جکڑے ملزم کو تھپڑ مارے۔ واقعے کی ویڈیو سوشل میڈیا پر سامنے آنے کے بعد وزیراعلیٰ پنجاب مریم نواز نے بھی سخت ردعمل کا اظہار کیا ہے۔
وزیراعلیٰ مریم نواز نے سماجی رابطے کی ویب سائٹ ’ایکس‘ پر متاثرہ خاتون کی جانب سے ملزم کو تھپڑ مارنے کی ویڈیو شیئر کرتے ہوئے کہا کہ روزگار کے لیے گھر سے نکلنے والی بے بس خاتون پر ہاتھ اٹھانے والے کو اسی ذلت کا سامنا کرنا پڑے گا۔
اپنے پیغام میں وزیراعلیٰ پنجاب کا کہنا تھا کہ متاثرہ خاتون کو بھی یہ حق اور موقع ملنا چاہیے کہ وہ تشدد کرنے والے شخص کو تھپڑ مار سکے۔
مریم نواز نے واضح کیا کہ کوئی شخص خواہ کتنا ہی دولت مند، بااثر یا طاقت ور کیوں نہ ہو، کسی عام شہری کو خوف زدہ کرنے، اس کا استحصال کرنے یا اسے نقصان پہنچانے کے بعد قانون کی گرفت سے نہیں بچ سکے گا۔
ان کا کہنا تھا کہ ریاست کمزور اور بے بس شہریوں کے ساتھ مضبوطی سے کھڑی ہوگی اور اختیارات کا ناجائز استعمال کرنے والوں کے خلاف کارروائی کی جائے گی۔
وزیراعلیٰ نے مزید کہا کہ کمزور شہریوں پر ظلم کرکے بچ نکلنے کا دور ختم ہوچکا ہے اور ریاست طاقت کا غلط استعمال کرنے والوں کو بھرپور جواب دے گی۔
واضح رہے کہ فیصل آباد کے ایک شاپنگ مال میں خواتین کے لیے مختص جگہ پر زبردستی داخل ہونے والے شخص نے خاتون سیلز گرل کو تشدد کا نشانہ بنایا تھا۔
واقعے کی سی سی ٹی وی فوٹیج منظر عام پر آنے کے بعد وزیراعلیٰ پنجاب مریم نواز نے فوری نوٹس لیا، جس کے بعد پولیس نے کارروائی کرتے ہوئے ملزم کو گرفتار کرلیا۔
