نیوز ڈیسک
لنڈی کوتل: خیبر پختونخوا کے ضلع خیبر کے علاقے لنڈی کوتل میں پراسرار بیماری نے ایک ہی خاندان کے پانچ کمسن بچوں کی جان لے لی، جبکہ دو دیگر متاثرہ بچوں کو پشاور کے حیات آباد میڈیکل کمپلیکس میں طبی امداد فراہم کی جا رہی ہے۔
پولیس کے مطابق افسوس ناک واقعہ تھانہ بازار ذخہ خیل کی حدود میں واقع قاضیانو کلے میں پیش آیا، جہاں ایک ہی خاندان کے سات بچے اچانک بے ہوش ہوگئے۔
متاثرہ بچوں کو فوری طبی امداد کے لیے حیات آباد میڈیکل کمپلیکس پشاور منتقل کیا جا رہا تھا، تاہم اسپتال پہنچنے سے قبل راستے میں پانچ بچے دم توڑ گئے۔
پولیس حکام کا کہنا ہے کہ جاں بحق ہونے والے بچوں کی عمریں پانچ سال سے کم تھیں، جن میں تین بچیاں اور دو لڑکے شامل ہیں۔
دوسری جانب ضلعی انتظامیہ کے مطابق ڈپٹی کمشنر کی ہدایت پر اسسٹنٹ کمشنر لنڈی کوتل نے حیات آباد میڈیکل کمپلیکس کا دورہ کیا اور زیر علاج دونوں بچوں کی عیادت کرتے ہوئے ان کی صحت اور علاج معالجے سے متعلق معلومات حاصل کیں۔
طبی ذرائع کے مطابق متاثرہ بچوں کے ابتدائی ٹیسٹوں میں کیلشیم، میگنیشیم اور پی ٹی، آئی این آر کی سطح معمول کے مطابق پائی گئی، جبکہ ہیموگلوبن 11.7 اور پلیٹ لیٹس 634 ریکارڈ کیے گئے ہیں۔
ڈاکٹروں نے مرض کی اصل وجہ جاننے اور مزید تشخیص کے لیے بلڈ کلچر اور سی ٹی اسکین سمیت اضافی طبی ٹیسٹ تجویز کیے ہیں۔
پولیس کے مطابق پانچ بچوں کی اچانک اموات کی وجوہات تاحال سامنے نہیں آسکیں، جبکہ حیات آباد میڈیکل کمپلیکس کے طبی ماہرین متاثرہ بچوں کی حالت اور بیماری کی ممکنہ وجوہات کا جائزہ لے رہے ہیں۔
تاحال یہ واضح نہیں ہوسکا کہ بچوں کی اموات کسی انفیکشن، زہریلے مادے یا کسی دوسری طبی پیچیدگی کے باعث ہوئیں۔
