نیوز ڈیسک
راولپنڈی: بانی پاکستان تحریک انصاف (پی ٹی آئی) عمران خان کے اہل خانہ کی رہائی سے متعلق پیش رفت سامنے آئی ہے، جہاں ان کے کزن قاسم زمان کو اڈیالہ جیل سے رہا کردیا گیا ہے، جبکہ ان کی بہنوں نورین نیازی اور عظمیٰ خان کی رہائی کے لیے بھی پس پردہ رابطوں کا سلسلہ جاری ہے۔
قاسم زمان کے وکیل نے ان کی رہائی کی تصدیق کرتے ہوئے بتایا ہے کہ انہیں 6 نومبر کو اڈیالہ جیل سے رہا کیا گیا تھا۔
ذرائع کے مطابق قاسم زمان کی تھری ایم پی او کے تحت نظر بندی کے حکم میں مزید توسیع نہیں کی گئی، جس کے بعد ان کی رہائی ممکن ہوئی۔
ادھر عمران خان کی بہنوں نورین نیازی اور عظمیٰ خان کی رہائی کے معاملے پر بھی اہم رابطے جاری ہیں۔ ذرائع کا دعویٰ ہے کہ پس پردہ بات چیت میں پیش رفت کی صورت میں دونوں خواتین کو رہا کیا جاسکتا ہے۔
ذرائع کے مطابق آئندہ 48 گھنٹوں کے دوران طبی بنیادوں پر بھی نورین نیازی اور عظمیٰ خان کی رہائی کا امکان ظاہر کیا جا رہا ہے، تاہم اس حوالے سے تاحال کوئی باضابطہ اعلان سامنے نہیں آیا۔
دوسری جانب عمران خان کی ایک اور بہن علیمہ خان کی رہائی کے معاملے میں فی الحال کسی فوری پیش رفت کے امکانات کم بتائے جا رہے ہیں۔
واضح رہے کہ قاسم زمان کو 6 اکتوبر 2026 کو اس وقت حراست میں لیا گیا تھا جب وہ عمران خان سے ملاقات کے لیے اڈیالہ جیل جا رہے تھے۔ انہیں گورکھپور ناکے سے گرفتار کرکے تھری ایم پی او کے تحت نظر بند کیا گیا تھا۔
راولپنڈی کے ڈپٹی کمشنر نے پولیس اور ضلعی انتظامیہ کی کمیٹی کی سفارش پر ایم پی او کی دفعہ 3 کے تحت ان کی 30 روزہ نظر بندی کا حکم جاری کیا تھا۔
حکم نامے میں قاسم زمان پر غیر قانونی اجتماعات منعقد کرنے، تشدد پر اکسانے اور امن و امان کی صورت حال خراب کرنے کی منصوبہ بندی کے الزامات عائد کیے گئے تھے۔
قاسم زمان کی رہائی کے بعد اب توجہ عمران خان کی زیر حراست بہنوں کی ممکنہ رہائی سے متعلق جاری رابطوں پر مرکوز ہوگئی ہے۔
