نیوز ڈیسک
اسلام آباد: وفاقی حکومت نے پیٹرولیم مصنوعات کی قیمتوں میں کمی کا اعلان کرتے ہوئے پیٹرول کی فی لیٹر قیمت 8 روپے اور ہائی اسپیڈ ڈیزل کی قیمت 7 روپے کم کردی ہے، جس کے بعد پیٹرول 338 روپے جبکہ ڈیزل 371 روپے فی لیٹر میں دستیاب ہوگا۔
پیٹرولیم ڈویژن کی جانب سے جاری کردہ نوٹیفکیشن کے مطابق پیٹرولیم مصنوعات کی نئی قیمتوں کا اطلاق 11 نومبر تک کے لیے کیا گیا ہے۔
نوٹیفکیشن میں بتایا گیا ہے کہ آئل اینڈ گیس ریگولیٹری اتھارٹی (اوگرا) نے وفاقی حکومت کے مقرر کردہ طریقہ کار کے تحت عالمی منڈی میں قیمتوں اور دیگر متعلقہ اخراجات کا جائزہ لینے کے بعد نئی قیمتوں کا تعین کیا ہے۔
قیمتوں میں کمی کے بعد پیٹرول کی فی لیٹر قیمت 346 روپے سے کم ہو کر 338 روپے ہوگئی ہے، جبکہ ہائی اسپیڈ ڈیزل کی قیمت 378 روپے سے گھٹ کر 371 روپے فی لیٹر مقرر کردی گئی ہے۔
پیٹرولیم ڈویژن کے مطابق عالمی منڈی میں پیٹرولیم مصنوعات کی قیمتوں، پریمیم، پلاٹس ریٹس اور دیگر اخراجات کو مدنظر رکھتے ہوئے قیمتوں میں رد و بدل کیا گیا ہے۔
اعداد و شمار کے مطابق 17 جولائی سے اب تک پیٹرول کی قیمت میں مجموعی طور پر 36 مرتبہ کمی اور 39 مرتبہ اضافہ ریکارڈ کیا گیا ہے، جبکہ اسی عرصے کے دوران ہائی اسپیڈ ڈیزل کی قیمت میں 32 مرتبہ کمی اور 45 مرتبہ اضافہ ہوا ہے۔
یاد رہے کہ اس سے قبل 6 نومبر کو حکومت نے 7 سے 10 نومبر تک کے لیے پیٹرول کی قیمت میں 6 روپے 59 پیسے اور ہائی اسپیڈ ڈیزل کی قیمت میں 4 روپے 25 پیسے فی لیٹر کمی کا اعلان کیا تھا۔ اس فیصلے کے بعد پیٹرول 346 روپے اور ڈیزل 378 روپے فی لیٹر مقرر کیا گیا تھا۔
واضح رہے کہ مشرق وسطیٰ میں جاری بحران کے تناظر میں حکومت پیٹرولیم مصنوعات کی قیمتوں کا روزانہ کی بنیاد پر تعین کر رہی ہے، تاہم ہفتہ اور اتوار کو قیمتیں برقرار رکھی جاتی ہیں۔
دریں اثنا، مہنگے ایندھن کے اثرات کم کرنے کے لیے وزیراعظم شہباز شریف نے 13 ستمبر کو موٹرسائیکل، رکشہ، چنگچی اور 800 سی سی تک کی گاڑیوں کے صارفین کو پیٹرول پر فی لیٹر 100 روپے ریلیف دینے کا اعلان بھی کیا تھا۔
