نیوز ڈیسک
لاہور: پاکستان کرکٹ بورڈ (پی سی بی) نے لاہور میں اسموگ کی بڑھتی ہوئی شدت کے پیش نظر پاکستان اور سری لنکا کے درمیان دوسرا ٹیسٹ میچ لاہور سے راولپنڈی منتقل کرنے کا فیصلہ کیا ہے، تاہم میچ کے شیڈول میں کوئی تبدیلی نہیں کی گئی۔
پی سی بی کے ترجمان نے میچ کے وینیو کی تبدیلی کی تصدیق کرتے ہوئے بتایا کہ دوسرا ٹیسٹ اب 17 سے 21 نومبر تک راولپنڈی کرکٹ اسٹیڈیم میں کھیلا جائے گا۔
ابتدائی شیڈول کے مطابق دونوں ٹیموں کے درمیان سیریز کا دوسرا ٹیسٹ لاہور میں ہونا تھا، تاہم شہر میں اسموگ کی شدت کے باعث میچ راولپنڈی منتقل کردیا گیا ہے۔
ترجمان کے مطابق میچ کی تاریخیں برقرار رکھی گئی ہیں اور صرف مقام تبدیل کیا گیا ہے۔
واضح رہے کہ پاکستان اور سری لنکا کے درمیان دو ٹیسٹ میچوں کی سیریز کا پہلا مقابلہ بھی راولپنڈی میں جاری ہے۔ دوسرے ٹیسٹ کی منتقلی کے بعد سیریز کے دونوں میچز راولپنڈی کرکٹ اسٹیڈیم میں کھیلے جائیں گے۔
