نیوز ڈیسک
تہران: فرانس کی جانب سے ایران پر سائبر حملوں میں ملوث ہونے کے الزامات کے بعد ایرانی وزیر خارجہ عباس عراقچی نے سخت ردعمل دیتے ہوئے فرانسیسی حکومت کو تنقید کا نشانہ بنایا ہے اور الزام عائد کیا ہے کہ پیرس اپنی داخلی ناکامیوں کا ذمہ دار دوسروں کو ٹھہرا رہا ہے۔
سماجی رابطے کی ویب سائٹ ایکس پر اپنے بیان میں عباس عراقچی نے فرانسیسی وزارت خارجہ کے ان الزامات پر ردعمل دیا جن میں ایران کو فرانس میں ریٹیل مراکز کے ریفریجریشن سسٹمز پر سائبر حملوں کا ذمہ دار قرار دیا گیا تھا۔
ایرانی وزیر خارجہ نے طنزیہ انداز میں کہا کہ فرانسیسی حکام اپنے عوام کے مسائل حل کرنے سے قاصر ہیں اور ان کی حکومت سپر مارکیٹوں کے فریج تک سنبھالنے کی صلاحیت نہیں رکھتی، لیکن اپنی ناکامیوں کا الزام دوسروں پر عائد کر رہی ہے۔
عباس عراقچی نے فرانسیسی حکومت پر زور دیا کہ وہ دوسروں کو مورد الزام ٹھہرانے کے بجائے اپنے عوام کی شکایات اور مسائل کے حل پر توجہ دے۔
انہوں نے ایران کی طاقت کا حوالہ دیتے ہوئے کہا کہ ایران بلاشبہ ایک طاقتور ملک ہے، تاہم فرانس کے برعکس تہران اپنی طاقت غزہ میں قتل و غارت گری کی حمایت یا اسکولوں اور اسپتالوں پر بمباری کے لیے استعمال نہیں کرتا۔
دوسری جانب فرانسیسی وزارت خارجہ نے دعویٰ کیا تھا کہ 11 اور 12 اکتوبر کی درمیانی شب ہونے والی سائبر حملوں کی ایک منظم مہم میں فرانس کے 700 سے زائد ریٹیل مراکز کے ریفریجریشن سسٹمز کو نشانہ بنایا گیا۔
فرانسیسی حکام کے مطابق ان حملوں کے نتیجے میں مالی نقصان ہوا، بعض مقامات پر آگ لگنے کے واقعات پیش آئے جبکہ خوراک خراب ہونے سے کروڑوں یورو کا نقصان بھی ریکارڈ کیا گیا۔
فرانس نے ان سائبر حملوں کا الزام ایرانی پاسداران انقلاب سے منسلک ایک سائبر یونٹ پر عائد کرتے ہوئے انہیں ملک کے اہم نظام اور تنصیبات کے لیے خطرہ قرار دیا تھا۔
فرانسیسی حکومت نے اس معاملے پر احتجاج ریکارڈ کرانے کے لیے ایرانی سفیر کو طلب کرنے اور مبینہ حملوں میں ملوث ایرانی اداروں اور افراد کے خلاف مزید پابندیاں عائد کرنے کی تجویز پیش کرنے کا اعلان بھی کیا تھا۔
تاہم عباس عراقچی نے ان الزامات کو مسترد کرتے ہوئے فرانسیسی حکومت کی داخلی پالیسیوں اور عوامی مسائل سے نمٹنے کی صلاحیت پر سوالات اٹھائے ہیں۔
