کیا شہباز شریف 5 سال پورے کر پائیں گے؟ بلاول بھٹو بول پڑے

0

نیوز ڈیسک 

کراچی:  پاکستان پیپلز پارٹی کے چیئرمین بلاول بھٹو زرداری نے وزیراعظم شہباز شریف کی کارکردگی کو سراہتے ہوئے کہا ہے کہ انہوں نے شہباز شریف کو دو مرتبہ وزیراعظم بنوانے میں کردار ادا کیا اور چاہتے ہیں کہ وہ مضبوط ہوں۔ انہوں نے دعا کی کہ شہباز شریف پاکستان کے پہلے وزیراعظم بنیں جو اپنی پانچ سالہ آئینی مدت مکمل کریں۔

کراچی میں ایک تقریب سے خطاب کرتے ہوئے بلاول بھٹو زرداری نے کہا کہ ملک کی معاشی صورت حال انتہائی مشکل ہے اور انہوں نے اپنی زندگی میں اس سے زیادہ سنگین معاشی حالات نہیں دیکھے۔ ایران جنگ کے اثرات کے باعث عوام مہنگائی کا سامنا کر رہے ہیں اور جنگ کا معاشی بوجھ ہر شہری کو برداشت کرنا پڑ رہا ہے۔

خطے میں امن کا معاہدہ نظر نہیں آ رہا

چیئرمین پیپلز پارٹی کا کہنا تھا کہ تاحال خطے میں امن کے حوالے سے کوئی معاہدہ سامنے نہیں آیا اور جب تک جنگ ختم نہیں ہوتی، عوام کو مشکلات کا سامنا رہے گا۔ انہوں نے خدشہ ظاہر کیا کہ موجودہ صورت حال میں معاشی دباؤ مزید بڑھ سکتا ہے اور کھاد کی دستیابی بھی متاثر ہونے کا امکان ہے۔

بلاول بھٹو نے کہا کہ دنیا بھر کی حکومتیں اپنے عوام کو ریلیف دینے کے لیے منصوبہ بندی کر رہی ہیں، لہٰذا پاکستان میں بھی یہ سوچنے کی ضرورت ہے کہ مشکل معاشی حالات میں شہریوں کو کس طرح سہولت فراہم کی جا سکتی ہے۔

ان کے مطابق ملک میں مہنگائی، بے روزگاری اور غربت جیسے مسائل موجود ہیں، جبکہ ڈیزل، بجلی اور گیس کے بھاری بل بھی عوام کی مشکلات میں اضافہ کر رہے ہیں۔

انہوں نے افسوس کا اظہار کیا کہ سیاست دانوں اور حکمرانوں نے عوامی مسائل اور ان کی پریشانیوں پر توجہ دینا چھوڑ دی ہے، حالانکہ انہیں بخوبی معلوم ہے کہ عام شہری کن مشکلات سے گزر رہے ہیں۔

چھوٹے کاشت کاروں کے لیے مالی معاونت

بلاول بھٹو زرداری نے کہا کہ پیپلز پارٹی ہمیشہ چھوٹے کاشت کاروں اور ہاریوں کی نمائندگی کرتی آئی ہے اور مشکل معاشی حالات میں زرعی شعبے کی معاونت جماعت کی ترجیحات میں شامل رہی ہے۔

انہوں نے بتایا کہ چھوٹے کاشت کار زرعی شعبے کا 90 فیصد حصہ ہیں، جبکہ بے نظیر ہاری کارڈ کا مقصد چھوٹے کسانوں اور زمینداروں کو مالی ریلیف فراہم کرنا ہے۔

ان کا کہنا تھا کہ سندھ میں صفر سے 25 ایکڑ تک اپنی زمین پر خود کاشت کاری کرنے والے کسانوں کی معاونت کی جائے گی، جبکہ انہیں فی ایکڑ 4 ہزار روپے مالی امداد بھی فراہم کی جا رہی ہے۔

چیئرمین پیپلز پارٹی نے تھرپارکر اور عمرکوٹ کو آفت زدہ قرار دینے کے فیصلے کا خیرمقدم کرتے ہوئے کہا کہ بے نظیر انکم سپورٹ پروگرام کے تحت متاثرہ خاندانوں کو 8 ہزار روپے فراہم کرنے کا اقدام بھی قابل تحسین ہے۔

انہوں نے کہا کہ معاشی بحران کے دوران عوام کی مدد کرنا پیپلز پارٹی کی پالیسی ہے اور جماعت کی اولین ترجیح شہریوں کو ریلیف فراہم کرنا ہے۔ اس کے علاوہ عوام کو علاج معالجے کی مفت سہولیات بھی فراہم کی جا رہی ہیں۔

وزیراعظم کو معاشی منصوبہ بندی کا موقع نہیں ملا

وزیراعظم شہباز شریف کی معاشی پالیسیوں پر گفتگو کرتے ہوئے بلاول بھٹو نے کہا کہ پاکستان کو ڈیفالٹ سے بچانے کے لیے غیر معمولی مشکلات کا سامنا کرنا پڑا اور معیشت کو درست سمت میں لانے کی کوشش کی گئی، تاہم وزیراعظم کو معاشی مسائل سے نمٹنے کے لیے اپنا منصوبہ تیار کرنے اور اس پر عمل درآمد کا مناسب موقع نہیں ملا۔

انہوں نے کہا کہ وزیراعظم کو تمام سیاسی جماعتوں کو ایک میز پر بٹھا کر معاشی بحران سے نکلنے کے لیے مشترکہ حکمت عملی بنانے کا موقع نہیں دیا گیا، جبکہ وزیراعظم کی ٹیم کے بعض وزرا اپنا الگ ایجنڈا شروع کر دیتے ہیں۔

بلاول بھٹو زرداری نے کہا کہ انہوں نے دو مرتبہ شہباز شریف کو وزیراعظم بنوانے میں کردار ادا کیا اور وہ چاہتے ہیں کہ وزیراعظم کے ہاتھ مضبوط ہوں۔ 

انہوں نے شہباز شریف کی کامیابی کے لیے نیک خواہشات کا اظہار کرتے ہوئے کہا کہ ان کی خواہش ہے کہ وہ پاکستان کے پہلے وزیراعظم ہوں جو اپنی آئینی مدت مکمل کریں۔

سیاسی اختلافات کے باوجود قومی اتفاق رائے پر زور

ملک کی سیاسی صورت حال پر بات کرتے ہوئے بلاول بھٹو نے کہا کہ موجودہ حالات میں کوئی ایک یا دو سیاسی جماعتیں تنہا تمام مسائل حل نہیں کر سکتیں۔ مولانا فضل الرحمان سے اختلاف یا اتفاق اپنی جگہ، لیکن وہ اس وقت اپوزیشن کا حصہ ہیں۔

انہوں نے کہا کہ عمران خان کی جماعت کے پاس اپوزیشن میں سب سے زیادہ تعداد ہے اور اسے پارلیمان میں واپسی کے لیے سیاسی رابطے کرنے چاہئیں۔ ان کے مطابق سیاسی ضد اور انتقام کو ملکی مفاد پر ترجیح نہیں دینی چاہیے۔

چیئرمین پیپلز پارٹی کا کہنا تھا کہ عوام کو اس بات سے زیادہ اپنے معاشی مسائل کی فکر ہے کہ ملک میں ایک صوبہ بنایا جائے یا ایک ہزار، شہری اپنے بنیادی مسائل کا حل چاہتے ہیں۔

انہوں نے مزید کہا کہ انہیں اپنا مؤقف اور تجاویز عوام کے سامنے رکھنے کا حق حاصل ہے، تاہم ان تجاویز پر عمل کرنا یا نہ کرنا وزیراعظم کی صوابدید ہے۔

Leave A Reply

Your email address will not be published.