اینکر پرسن ربیعہ احسن قتل کیس، شوہر احسن طاہر اڈیالہ جیل سے رہا

0

نیوز ڈیسک

راولپنڈی: نجی ٹی وی چینل کی سینئر اینکر پرسن ربیعہ احسن کے قتل کیس میں اہم پیش رفت ہوئی ہے، جہاں عدالت سے ضمانت منظور ہونے کے بعد مقتولہ کے شوہر احسن طاہر کو اڈیالہ جیل سے رہا کر دیا گیا ہے۔

ذرائع کے مطابق احسن طاہر کی رہائی کے احکامات (روبکار) اڈیالہ جیل انتظامیہ کو موصول ہونے کے بعد ان کی رہائی عمل میں لائی گئی۔

یاد رہے کہ گزشتہ روز ایڈیشنل ڈسٹرکٹ اینڈ سیشن جج خرم سلیم نے ملزم احسن طاہر کی درخواست ضمانت بعد از گرفتاری 2 لاکھ روپے کے مچلکوں کے عوض منظور کی تھی۔ تاہم ضروری دستاویزات مکمل نہ ہونے کے باعث انہیں گزشتہ روز رہا نہیں کیا جا سکا تھا۔

آج رہائی کی روبکار جیل انتظامیہ کو موصول ہونے کے بعد احسن طاہر کو رہا کر دیا گیا۔

اہل خانہ نے احسن طاہر کو معاف کر دیا تھا

اس سے قبل مقتولہ ربیعہ احسن کے اہل خانہ نے ملزم احسن طاہر کو معاف کرنے کا اعلان کرتے ہوئے عدالت میں حلف نامے جمع کرائے تھے۔

مقتولہ کی والدہ، بہن اور مقدمے کے مدعی خرم احمد کی جانب سے جمع کرائے گئے حلف ناموں میں واقعے کو حادثاتی فائرنگ قرار دیتے ہوئے ملزم کو معاف کرنے اور اس کی رہائی پر کوئی اعتراض نہ ہونے کا مؤقف اختیار کیا گیا تھا۔

اہل خانہ نے عدالت کو بتایا تھا کہ ان کے مطابق ربیعہ احسن کی موت حادثاتی فائرنگ کے نتیجے میں ہوئی اور وہ ملزم کے خلاف مقدمے کی مزید پیروی نہیں کرنا چاہتے۔

ربیعہ احسن کا قتل کیسے ہوا تھا؟

واضح رہے کہ نجی ٹی وی چینل کی اینکر پرسن ربیعہ احسن 8 نومبر کو راولپنڈی کے علاقے گلشن آباد میں اپنے گھر پر گولی لگنے سے جاں بحق ہو گئی تھیں، جس کے بعد پولیس نے ان کے شوہر احسن طاہر کو گرفتار کر لیا تھا۔

واقعے کے درج مقدمے کے مطابق فائرنگ کی آواز سن کر گھر کے لان میں موجود مقتولہ کی والدہ اور بہن کمرے میں پہنچیں تو ربیعہ احسن خون میں لت پت فرش پر پڑی تھیں، جبکہ ان کے شوہر احسن طاہر کے ہاتھ میں پستول موجود تھا۔

واقعے کے بعد سی پی او راولپنڈی حسن مشتاق سکھیرا نے میڈیا کو بتایا تھا کہ ابتدائی تفتیش میں یہ بات سامنے آئی ہے کہ گولی ملزم احسن طاہر کے پستول سے چلی، تاہم فائرنگ جان بوجھ کر کی گئی یا حادثاتی طور پر ہوئی، اس حوالے سے تحقیقات جاری ہیں۔

احسن طاہر نے تفتیش میں کیا مؤقف اختیار کیا؟

پولیس تفتیش کے دوران احسن طاہر نے مؤقف اختیار کیا تھا کہ انہوں نے الماری سے کپڑے نکالتے ہوئے پستول اٹھایا اور میگزین موجود نہ ہونے کے باعث اسے خالی سمجھا۔ ان کے بقول انہوں نے مذاق میں ربیعہ کی جانب پستول تان کر ٹریگر دبایا، جس سے اچانک گولی چل گئی۔

تفتیشی ریکارڈ کے مطابق ربیعہ احسن اور احسن طاہر نے 2010 میں پسند کی شادی کی تھی اور دونوں ماضی میں ایک نجی بینک میں بھی اکٹھے ملازمت کر چکے تھے۔

ملزم نے اپنے بیان میں بتایا تھا کہ کورونا وبا کے دوران ربیعہ نے اپنا بیوٹی سیلون قائم کیا تھا، جہاں دو ملازماؤں کے درمیان تنازع کے دوران ایک خاتون نے دوسری کو ملازمت سے نکلوانے کے لیے اس پر احسن طاہر سے تعلقات کا جھوٹا الزام عائد کیا تھا۔

احسن طاہر کے مطابق اس معاملے پر میاں بیوی کے درمیان وقتی ناراضی پیدا ہوئی، تاہم بعد میں وضاحت کے ذریعے یہ معاملہ حل ہو گیا تھا۔

ملزم کا مزید دعویٰ تھا کہ ان کی 16 سالہ ازدواجی زندگی میں اس واقعے کے علاوہ کوئی بڑا تنازع پیش نہیں آیا اور وہ روزانہ شام کو ربیعہ کے ساتھ جم میں بیڈمنٹن بھی کھیلا کرتے تھے۔

دوسری جانب گزشتہ روز پولیس نے 9 روزہ جسمانی ریمانڈ مکمل ہونے پر احسن طاہر کو جوڈیشل ریمانڈ پر جیل بھیجنے کی استدعا کی تھی، جسے عدالت نے منظور کر لیا تھا۔ پولیس نے عدالت کو بتایا تھا کہ ملزم کے ڈی این اے اور پولی گرافک ٹیسٹ بھی مکمل ہو چکے ہیں۔

Leave A Reply

Your email address will not be published.