اسلام آباد:شنگھائی تعاون تنظیم کا سربراہی اجلاس شروع ہو گیا ہے، جو علاقائی اور بین الاقوامی امور پر بات چیت اور تعاون کا ایک اہم پلیٹ فارم ہے۔
اس اجلاس میں رکن ممالک کے رہنما ایک دوسرے کے ساتھ تعاون کو بڑھانے، اقتصادی ترقی، سیکیورٹی چیلنجز، اور دیگر اہم مسائل پر تبادلہ خیال کریں گے۔ یہ موقع رکن ممالک کے درمیان ہم آہنگی اور یکجہتی کو فروغ دینے کا بھی ہے۔
وزیرِ اعظم شہباز شریف نے شنگھائی تعاون تنظیم (ایس سی او) کے اجلاس کا افتتاح کرتے ہوئے کہا کہ اس کا انعقاد ہمارے لیے ایک اعزاز ہے۔
انہوں نے اجلاس کے دوران شرکاء کو بتایا کہ ایس سی او ممالک دنیا کی آبادی کا 40 فیصد ہیں، اور پائیدار ترقی کے لیے علاقائی تعاون اور روابط کی ضرورت ہے۔
شہباز شریف نے کہا کہ ہمیں معاشی ترقی، استحکام، اور خوش حالی کے لیے مشترکہ طور پر کام کرنا ہوگا تاکہ اپنے لوگوں کو بہتر معیار زندگی فراہم کر سکیں۔
انہوں نے یقین دلایا کہ اجلاس میں سیر حاصل گفتگو کے دور رس نتائج حاصل ہوں گے، خاص طور پر عالمی منظر نامے میں تبدیلیوں اور چیلنجز کا سامنا کرتے ہوئے۔
وزیرِ اعظم نے زور دیا کہ اجلاس رکن ممالک کے ساتھ تعلقات کو فروغ دینے کا موقع فراہم کرے گا اور ہمیں اجتماعی دانش کو بروئے کار لاتے ہوئے آگے بڑھنا چاہیے۔
انہوں نے افغانستان کی صورت حال پر بھی بات کی، اور عالمی برادری سے انسانی بنیادوں پر امداد پر توجہ دینے کی اپیل کی۔
مزید پرئیے:https://urdu.thepenpk.com/?p=4632
شہباز شریف نے کہا کہ پاکستان ایک پُرامن، مستحکم، اور خوشحال افغانستان کا خواہاں ہے۔
انہوں نے مزید کہا کہ سیاحت، روابط، اور موسمیاتی تبدیلیوں جیسے چیلنجز پر توجہ کی ضرورت ہے، اور مشترکہ مستقبل کے لیے اقتصادی استحکام ضروری ہے۔
اجلاس کے دوران معیشت، تجارت، ماحولیات، اور سماجی و ثقافتی روابط کے شعبوں میں جاری تعاون پر تبادلہ خیال کیا جائے گا۔
اجلاس کے آغاز سے پہلے مہمانوں کا وزیرِ اعظم شہباز شریف اور نائب وزیرِ اعظم اسحاق ڈار نے استقبال کیا، اور ایک گروپ فوٹو بھی بنوایا گیا۔
اجلاس میں چین، روس، قازقستان، منگولیا، ترکمانستان، بیلاروس، ایران، اور بھارت کے وزرائے اعظم اور دیگر اعلیٰ حکام شریک ہیں۔
وزیرِ اعظم نے مہمانوں کے اعزاز میں عشائیے کا بھی اہتمام کیا، جس میں مختلف ممالک کے قائدین نے شرکت کی۔
وزیرِ اعظم شہباز شریف نے مہمانوں کو خوش آمدید کہتے ہوئے بھارتی وزیر خارجہ سبرامنیم جے شنکر کے ساتھ مصافحہ اور خوش گوار گفتگو کی۔
شہباز شریف نے اجلاس میں شرکت پر جے شنکر کا خیر مقدم کرتے ہوئے شنگھائی تعاون تنظیم (ایس سی او) کے اصولوں اور مقاصد کو آگے بڑھانے کے عزم کا اعادہ کیا۔
مہمانوں نے ایس سی او سربراہی اجلاس کے کامیاب انعقاد پر وزیرِ اعظم شہباز شریف کو مبارک باد دی۔
