پولیس چوکی گنانگر پر دہشت گردوں کی فائرنگ، دو اہلکار جاں بحق، تین زخمی

شانگلہ:شانگلہ کے علاقے چکیسر میں دہشت گردوں نے پولیس چوکی گنانگر پر حملہ کردیا، جس کے نتیجے میں دو پولیس اہلکار جاں بحق اور تین زخمی ہوگئے ہیں۔

پولیس کے مطابق دہشت گردوں کے حملے میں اے ایس آئی حسن خان اور ہیڈ کانسٹیبل نثار احمد سمیت دو اہلکار شہید ہو گئے ہیں، جبکہ محرر محمد حسین اور اہلکار ارشد خان و رفعت زخمی ہوئے ہیں۔

حملے کے بعد دہشت گرد موقع سے فرار ہونے میں کامیاب ہو گئے۔ تفصیلات کے مطابق، ضلع شانگلہ کی تحصیل چکسر میں واقع گنا نگر پولیس چوکی پر عسکریت پسندوں نے اندھا دھند فائرنگ کی اور ہینڈ گرنیڈ پھینکا، جس کے نتیجے میں اے ایس آئی حسن خان اور ہیڈ کانسٹیبل نثار احمد موقع پر ہی ہلاک ہوگئے۔

زخمیوں کی حالت تشویش ناک بتائی جا رہی ہے۔ واقعے کے بعد پولیس نے فوری طور پر سرچ آپریشن شروع کیا، اور حملے میں ملوث دہشت گردوں کی گرفتاری کے لیے اقدامات تیز کر دیے گئے ہیں۔ شہید اور زخمی اہلکاروں کو ڈی ایچ کیو ہسپتال بٹگرام منتقل کر دیا گیا۔

دوسری جانب وزیر داخلہ سید محسن نقوی نے پولیس چوکی پر دہشت گردوں کے حملے کی شدید مذمت کی ہے اور سوگوار خاندانوں سے دلی تعزیت کا اظہار کیا۔ وزیر داخلہ نے حملے میں زخمی ہونے والے اہلکاروں کی جلد صحت یابی کے لیے دعا کی اور کہا کہ پورا ملک شہداء کے خاندانوں کے ساتھ کھڑا ہے۔

وفاقی وزیر نے خیبرپختونخوا پولیس کے اہلکاروں کی قربانیوں کو خراجِ تحسین پیش کیا، جنہوں نے قوم کے لیے اپنی جانوں کا نذرانہ دیا۔

محسن نقوی کا مزید کہنا ہے کہ خیبرپختونخوا پولیس کے اہلکاروں کی قربانیاں ہمیشہ یاد رکھی جائیں گی، اور ان کے بہادری کے عمل کو سراہا جائے گا۔

مزید پرئیے:https://urdu.thepenpk.com/?p=5618