اسلام آباد:پاکستان میں ہر سال کینسر کے تقریباً ایک لاکھ پچاسی ہزار نئے کیسز رپورٹ ہو رہے ہیں، جبکہ ماہرین کے مطابق ایک لاکھ بیس ہزار افراد اس بیماری کے باعث جان کی بازی ہار جاتے ہیں۔ عالمی سطح پر، دو ہزار بیس میں کینسر کی وجہ سے دس ملین افراد اپنی زندگی سے محروم ہو گئے۔
وزیراعظم شہباز شریف کا پیغام
وزیراعظم شہباز شریف نے عالمی دن کے موقع پر اپنے پیغام میں کہا کہ تمام پاکستانی بروقت طبی مشاورت اور اسکریننگ کروائیں تاکہ بیماری کی جلد تشخیص ممکن ہو۔
انہوں نے کہا کہ کینسر کے علاج میں عالمی تعاون کی اہمیت کو پاکستان تسلیم کرتا ہے اور اس بیماری کے خلاف موثر اقدامات کیے جا رہے ہیں۔
وزیراعظم نے کہا کہ حکومت کینسر کی جلد تشخیص اور سستے علاج کو یقینی بنانے کے عزم کا اعادہ کرتی ہے۔
انہوں نے مزید کہا کہ کینسر عالمی سطح پر اموات کی دوسری بڑی وجہ ہے، اور پاکستان میں تحقیق، علاج اور مریضوں کی دیکھ بھال کے نظام میں نمایاں بہتری آئی ہے۔
وزیراعظم کا کہنا ہے کہ کینسر ایک بڑا چیلنج ہے، لیکن بروقت تشخیص، مؤثر علاج، اور صحت مند طرز زندگی اپنانے سے اس بیماری کو روکا جا سکتا ہے۔
کینسر کیسے پھیلتا ہے؟
کینسر بیماریوں کا ایک وسیع گروپ ہے جس کی بنیادی خصوصیت خلیوں کی غیر معمولی نشوونما اور پھیلاؤ ہے۔
یہ اس وقت پیدا ہوتا ہے جب عام خلیے کینسر زدہ خلیوں میں تبدیل ہو جاتے ہیں، جو بغیر رکاوٹ بڑھتے اور پھیلتے رہتے ہیں۔
جینز خلیوں کو مخصوص ہدایات فراہم کرتے ہیں، جیسے کب بڑھنا ہے اور کب رکنا ہے۔
عام خلیے ان ہدایات پر عمل کرتے ہیں، لیکن کینسر کے خلیے ان ہدایات کو نظر انداز کر کے بے قابو طور پر تقسیم ہونے لگتے ہیں۔
کینسر امریکہ میں اموات کی دوسری سب سے بڑی وجہ ہے، لیکن اب بیس سال پہلے کے مقابلے میں اس سے ہونے والی ہلاکتوں کی تعداد کم ہو گئی ہے۔
جلد تشخیص اور جدید علاج کے باعث کینسر کا مؤثر علاج ممکن ہو رہا ہے، جس سے مریضوں کی بقا کی شرح میں اضافہ ہو رہا ہے۔
مزید پرئیے:https://urdu.thepenpk.com/?p=6092
