شاہ سلمان کی عیدالفطر پر مبارکباد، مسلم دنیا میں امن و استحکام کی اپیل

ریاض: سعودی عرب کے فرمانروا اور حرمین شریفین کے متولی شاہ سلمان بن عبدالعزیز نے عیدالفطر کے موقع پر عالمِ اسلام کو مبارکباد دیتے ہوئے عالمی امن اور استحکام کے فروغ کے عزم کا اعادہ کیا ہے۔
اپنے خصوصی پیغام میں شاہ سلمان نے امت مسلمہ کے لیے سلامتی، خوشحالی اور یکجہتی کی دعا کی اور کہا کہ موجودہ عالمی حالات میں امن کے قیام کے لیے مشترکہ کوششیں ناگزیر ہیں۔
انہوں نے اس بات پر اطمینان کا اظہار کیا کہ رمضان المبارک کے دوران لاکھوں مسلمانوں نے سعودی عرب آ کر عمرہ کی سعادت حاصل کی، جو اسلامی دنیا کے روحانی اتحاد کی عکاسی کرتا ہے۔
دوسری جانب سعودی عرب، متحدہ عرب امارات، قطر، بحرین اور کویت سمیت خلیجی ممالک، ترکی، یمن اور روس میں آج عیدالفطر مذہبی جوش و جذبے کے ساتھ منائی جا رہی ہے۔ اس موقع پر مسجد الحرام، مسجد نبوی اور مسجد اقصیٰ سمیت مقدس مقامات پر بڑے اجتماعات ہوئے جہاں لاکھوں فرزندانِ اسلام نے نماز عید ادا کی۔
مسجد الحرام میں نماز عید کی امامت شیخ عبدالرحمن السدیس نے کرائی اور خطبہ دیا، جبکہ مسجد نبوی میں نماز عید کی امامت شیخ عبداللہ نے کی۔
متحدہ عرب امارات میں بھی عید کے بڑے اجتماعات دیکھنے میں آئے۔ دبئی کے القصاس علاقے میں خواتین اور بچوں سمیت تقریباً 15 ہزار افراد نے نماز عید ادا کی، جبکہ ابوظہبی، شارجہ اور دیگر امارات میں بھی بڑے پیمانے پر اجتماعات منعقد ہوئے۔ دبئی میں اس موقع پر روایتی توپ سے فائر بھی کیا گیا۔
ادھر آسٹریلیا میں بھی آج عید منائی جا رہی ہے جہاں وزیراعظم انتھونی البانیس نے سڈنی کی ایک مسجد میں شرکت کی۔ امریکہ، برطانیہ اور کینیڈا میں مسلم کمیونٹیز نے مختلف دنوں میں عیدالفطر منائی۔
فرانس میں عید کی تقریبات جاری ہیں جبکہ پاکستان، بھارت، بنگلہ دیش، سری لنکا، ملائیشیا اور انڈونیشیا میں کل عید منائی جائے گی۔ عمان، برونائی اور انڈونیشیا کے بعض علاقوں میں پیر کے روز عیدالفطر ہوگی۔
دنیا بھر میں عیدالفطر مذہبی عقیدت، بھائی چارے اور امن و ہم آہنگی کی دعاؤں کے ساتھ منائی جا رہی ہے۔