گوادر کا نوجوان فنکار ریت کو فن کے شاہکاروں میں ڈھالنے لگا

ظریف بلوچ
گوادر: گوادر کے ساحل پر جہاں سمندر کی لہریں چند لمحوں میں ریت پر بنے نقوش مٹا دیتی ہیں، ایک نوجوان فنکار اپنی تخلیقی صلاحیتوں سے ایسے فن پارے تخلیق کر رہا ہے جو عارضی ہونے کے باوجود لوگوں کے دلوں میں دیرپا اثر چھوڑ رہے ہیں۔
سچن بلوچ لکڑی کی ایک سادہ سی چھڑی کی مدد سے ساحل کی ریت کو کینوس میں تبدیل کرکے عالمی شہرت یافتہ شخصیات کے شاندار پورٹریٹ بناتے ہیں۔ ان کے فن پاروں میں فٹ بال کے معروف کھلاڑی لیونل میسی، کرسٹیانو رونالڈو اور لامین یامل، کرکٹ اسٹار شاہد آفریدی، بالی ووڈ اداکار شاہ رخ خان سمیت بلوچستان کی نمایاں ادبی اور ثقافتی شخصیات کے خاکے شامل ہیں۔
ریت پر بنائے گئے ان فن پاروں کی زندگی مختصر ہوتی ہے، کیونکہ سمندر کی لہریں انہیں دوبارہ اپنے اندر سمو لیتی ہیں، تاہم سوشل میڈیا پر ان کی تصاویر اور ویڈیوز نے سچن بلوچ کے فن کو عالمی سطح پر متعارف کرا دیا ہے۔

مزید پڑھیں: سچن بلوچ نے کسی باقاعدہ آرٹ ادارے سے تربیت حاصل نہیں کی بلکہ مسلسل محنت، مشق اور لگن کے ذریعے اپنی صلاحیتوں کو نکھارا۔ انہیں نہ کسی ادارہ جاتی معاونت حاصل ہے اور نہ ہی سرکاری سرپرستی، مگر ان کا فن اپنی منفرد نوعیت کے باعث لوگوں کی توجہ حاصل کر رہا ہے۔
نوجوان فنکار کا کہنا ہے کہ ان کا مقصد اپنے فن کے ذریعے گوادر کا ایک مثبت اور تخلیقی پہلو دنیا کے سامنے پیش کرنا ہے۔ ان کے لیے ریت صرف ایک ذریعہ اظہار ہے، جبکہ اصل طاقت تخیل، محنت اور جذبہ ہے۔
اگرچہ ہر فن پارہ وقت کے ساتھ سمندر کی لہروں میں گم ہوجاتا ہے، لیکن تصاویر اور ویڈیوز کے ذریعے یہ تخلیقات محفوظ ہو جاتی ہیں۔ سچن بلوچ کا فن اس بات کی مثال ہے کہ محدود وسائل کے باوجود ہنر اور عزم کے ذریعے عالمی سطح پر شناخت حاصل کی جا سکتی ہے، اور ایک مقامی فنکار اپنے شہر اور ملک کا ثقافتی سفیر بن سکتا ہے۔