کراچی: جمشید کوارٹرز پولیس نے کارروائی کرتے ہوئے بدنام زمانہ منشیات فروش انمول عرف پنکی کے بھائی کامران مراد کو گرفتار کر لیا۔ پولیس کے مطابق ملزم کے قبضے سے دو کلو چرس اور آدھا کلو آئس برآمد ہوئی ہے۔پولیس کا کہنا ہے کہ ملزم کو خفیہ اطلاع پر گھوڑا چورنگی کے قریب گرفتار کیا گیا۔ ابتدائی تحقیقات کے مطابق کامران مراد کراچی کے مختلف علاقوں میں چرس، آئس اور ہیروئن کی سپلائی میں ملوث تھا۔کارروائی کے دوران ملزم کا موبائل فون، پرس، شناختی کارڈ اور نقد رقم بھی قبضے میں لے لی گئی۔ پولیس کے مطابق ملزم اس سے قبل بھی منشیات فروشی کے مقدمات میں جیل جا چکا ہے، جبکہ اس کے خلاف تھانہ جمشید کوارٹرز میں مزید دو مقدمات درج کر لیے گئے ہیں۔
