نیوز ڈیسک
اسلام آباد:پاکستان میں پیٹرولیم مصنوعات کی قیمتوں میں یومیہ بنیادوں پر تبدیلی کے نئے نظام کے بعد ایندھن کے نرخوں میں مسلسل اتار چڑھاؤ دیکھا جا رہا ہے۔ گزشتہ چند ہفتوں کے دوران پیٹرول اور ہائی اسپیڈ ڈیزل کی قیمتوں میں متعدد بار اضافہ اور کمی ریکارڈ کی گئی۔
تازہ ترین نرخوں کے مطابق پاکستان میں پیٹرول 327 روپے 62 پیسے فی لیٹر جبکہ ہائی اسپیڈ ڈیزل 380 روپے 86 پیسے فی لیٹرمیں فروخت ہو رہا ہے۔
وفاقی حکومت کی منظوری کے بعد آئل اینڈ گیس ریگولیٹری اتھارٹی (اوگرا) نے پیٹرول کی قیمت میں2 روپے 20 پیسے فی لیٹرجبکہ ہائی اسپیڈ ڈیزل کی قیمت میں1 روپے 50 پیسے فی لیٹرکمی کی تھی۔
اس سے قبل پیٹرول329 روپے 82 پیسے جبکہ ہائی اسپیڈ ڈیزل 382 روپے 36 پیسے فی لیٹرکی قیمت پر دستیاب تھا۔
چند ہفتوں میں بار بار قیمتوں میں تبدیلی
20 جولائی سے اب تک کے اعداد و شمار کے مطابق پیٹرول کی قیمت میں مجموعی طور پر8 مرتبہ کمی اور 7 مرتبہ اضافہ کیا گیا، جبکہ ہائی اسپیڈ ڈیزل کی قیمت میں6 مرتبہ کمی اور 8 مرتبہ اضافہ ریکارڈ ہوا۔
ایندھن کی قیمتوں میں مسلسل تبدیلی کی بنیادی وجوہات میں عالمی منڈی میں خام تیل کی قیمتوں میں اتار چڑھاؤ، شرح مبادلہ اور ملکی سطح پر عائد ٹیکس شامل ہیں۔
20 جولائی کو پیٹرول کی قیمت میں 35 پیسے کمی ہوئی تھی، جبکہ ڈیزل کی قیمت میں 5 روپے 71 پیسے فی لیٹر اضافہ کیا گیا۔ اس کے بعد 21 سے 24 جولائی تک مسلسل چار روز دونوں ایندھن کی قیمتوں میں اضافہ ہوا۔
25 جولائی کو قیمتیں برقرار رہیں، تاہم 27 جولائی کو پیٹرول ایک روپے سستا جبکہ ڈیزل 3 روپے 37 پیسے مہنگا ہوگیا۔ اس کے بعد بھی دونوں مصنوعات کی قیمتوں میں تقریباً روزانہ کی بنیاد پر ردوبدل جاری رہا۔
31 جولائی کو حکومت نے پیٹرول کی قیمت میں 12 پیسے اور ڈیزل کی قیمت میں 66 پیسے فی لیٹر کمی کی، جس کے بعد یہ نرخ 3 اگست تک برقرار رہے۔4 اگست کو ایک مرتبہ پھر پیٹرول4 روپے 8 پیسے جبکہ ڈیزل2 روپے 45 پیسے فی لیٹر سستا کیا گیا۔
5 اگست کو بھی کمی کا سلسلہ جاری رہا اور پیٹرول کی قیمت میں3 روپے 39 پیسے جبکہ ہائی اسپیڈ ڈیزل کی قیمت میں 4 روپے 7 پیسے فی لیٹر کمی کی گئی۔
تاہم 6 اگست کو پیٹرول کی قیمت میں4 روپے 45 پیسے فی لیٹر اضافہ کردیا گیا، جبکہ ڈیزل کی قیمت میں 2 روپے فی لیٹر کمی کی گئی۔
یومیہ قیمتوں کا نیا نظام کیوں متعارف کرایا گیا؟
وفاقی وزیر پیٹرولیم علی پرویز ملک نے 17 جولائی کو اعلان کیا تھا کہ اب پیٹرولیم مصنوعات کی قیمتوں کا تعین روزانہ کی بنیاد پر کیا جائے گا اور اوگرا ان قیمتوں کا تعین کرکے اپنی ویب سائٹ پر جاری کرے گا۔
اس سے قبل پیٹرولیم مصنوعات کی قیمتوں پر عموماً ہر 15 روز بعد نظرثانی کی جاتی تھی، جس میں عالمی منڈی میں تیل کی قیمت، شرح مبادلہ اور متعلقہ ٹیکسز کو مدنظر رکھا جاتا تھا۔
حکومت کے مطابق امریکا اور ایران کے درمیان جاری کشیدگی کے باعث عالمی منڈی میں تیل کی قیمتوں میں تیزی سے تبدیلیاں آرہی ہیں، جس کے باعث یومیہ قیمتوں کے تعین کا نظام متعارف کرایا گیا ہے۔
نئے نظام کا مقصد عالمی مارکیٹ میں ہونے والی تبدیلیوں کو مقامی ایندھن کی قیمتوں میں زیادہ تیزی سے منتقل کرنا، مارکیٹ میں توازن برقرار رکھنا اور صارفین کے لیے قیمتوں کو عالمی رجحانات کے ساتھ ہم آہنگ کرنا ہے۔
